Taliban tepuokdak nungi Afghan nübur 60 dak tema kümzüka anitet

Islamabad, May 06 (Agencies): Afghanistan mitkartemi Taliban telok indang tepuokdak ka nungi nisung 60 dak tema kümzüka anitetba osang ka ketdangsertemi tanü, Hokolbar nü metetdaktsüogo.
Alima teloktep mitkartem teyari agia, Afghanistan mitkartemi Taliban teloki Afghanistan anülulentip tsütsülen, Helmand province nung tentetba tepuokdakji yasüng mita amak aser par teloki tashiyim agi pua alirtemji kümzüka anitet ta ketdangsertemi ashi.
“Taliban telungpurtemi Helmand province kübok Now Zad district nung tepuokdak ka tenteta liasü aser Afghan mitkartemi iba tepuokdak puoka alir nisung 60 dak tema yasüng o tanep na tsüngda kümzüka anitetogo,” ta North Atlantic Treaty Organization (NATO)-i Kabul nung tentetba Resolute Support Mission (RSM)-ia osang jangjashitsü.
Tan mitba maparenji Afghanistan nung tentetba kiralongrar anema raratsü telok, Ktah Khas aser Afghan mitkar commando-temi aroki lungjemer inyaka liasü ta RSM-isa metetdaktsü.
Tan agiba telungpur mittsü sentong nung Afghan mitkar züngsem ka danga meyiru saka parnoki telungpur 2 kasetba den külemi, parnok aika yiruja taküm apuba osang jangjaogo.
Tan tepuokdak nungi kümzüka anitetbapurtemji kidangsüa aliba Kandahar province tonga anir aoba sülen parnok ajunga Afghan sorkar ketdangsertem den ajurutepdaktsüba osanga jangjaogo.
Taliban teloki Now Zad densema, Helmand province kübok densemba district jenti par tashi kübok anioka aliba osang bushiteta lir.
Afghanistan mitkartemi ita ishika tsüngda nung tan agi Taliban teloki tentetba tepuokdak balala mita amakba maparen pezübuba agia Taliban teloki tashiyim agi pua ayurtem kümzüka aniteter lir.
“Tan kümzüka anitetertem timba nüburtem aliba osang jangjaogo,” ta Afghan Regional Army Commander, General Dawoodshah Wafadar-ia metetdaktsü.