Japan Ato Kilonser, Shinzo Abe-i Putin den ajuruteper

Sochi, May 06 (Agencies): Japan Ato Kilonser, Shinzo Abe-i Russia Tir, Vladimir Putin den Black Sea nung tentetba Sochi resort nung tanü, Hokolbar nü ajurutepogo.
Akidang nungi tenzüka par linük ana tsüngda adokba lushi den sentakba mangatettep ken o bentettsü nükjidong nung lenir anati tanü ajurutepba osang jangjaogo.
World War II (WWII) tembangba sülen Soviet miktartemi Japan yimli kübok aitba Northern Territories anülulentip tsütsülen densemba asetkong 4 tashi tashiyim agi agiba sülen Russia aser Japan na tsüngda tanü tashi tesendaktep junga meyangluteti lir.
Par linük ana tsüngda iba mangatetepbaren mebentetti aliba yong Japan aser Russia nati yimjung nung alitsü tezüngzüktepa zülutepa magitetba den külemi, par linük ana tsüngda shishilembatsü lenmanga ajak shibanga lir.
Par linük ana tsüngda adokba mangatettep ken o bentettsü senden ka taoba April ita amenba osang ka Japan Foreign Minister, Fumio Kishida-ia tawa metetdaktsüogo.
Ano, Russia-i Japan den adokba mangatettep ken o ajunga benteta par linük ana tsüngda tesendaktep tajung yur linük anaprongi tejakleni mera agitsü jangraba olen ka Russia Foreign Minister, Sergei Lavrov-ia taoba April ita Tokyo semdangdang metetdaktsüba osang angazükogo.
Par linük anapronglai mangatettep ken o agiena tanaben sentaktepshi jangra aka, Japan-i West linüktem den pusema, Ukraine ken o nung ajemdaker Russia anema tenokdangba sentong benokba ajanga par linük anati jangraba ama, tesendaktep junga meyangluteti lir.
Ano, Russia-ia tashiyim agi agia aliba asetkong ana tashi nung par mitkartem yutsüba ajanga Japan jashidaktsüba osang bushiteta lir.