Moko achitsü tanur ajungshirtem küm 7 jail nung puoktsü

New Delhi, May 06 (Agencies): Nisung kari tanur ka moko alitsü/achitsü ajungshira tepoukdak küm tenet tashi ayutsüa akok.
Women & child development Union Minister, Maneka Gandhi-i iba dak sentakba tekümdangtsü osang ka cigarette taseptsü nung inokner.
Brihostibarnü Maneka Gandhi-i shidi ka ajanga health & family welfare minister, JP Nadda dang iba temepishibaji agizüktsü mepishiogo.
Gandhi-i, Nadda-i ibaji agizükra tenapronglai senteper iba atemaji inyaktsü, ta ashi.
Nadda nungi telangzüba yakta angutsü imlar, ta laisa ashi.
Taküm January ita nungi tenzüka benokba Juvenile Justice (Care and Protection of Children) Act, 2015 kübok Section 77 nung ajemdaker Gandhi-i Nadda nem iba temepishibaji agütsü.
Section 77 nungji, “Nisung kati tanur ka nem temesepba yi mesüra moko chiyungtsütem mesüra psychotropic substances agütsüra mesüra ajungshira küm tenet tashi tepoukdak ayutsü aser sen lakh 1 tashi senchi achitsüa akok,” ta shia lir.
Kasa shidi nung Gandhi-i, “Moko achitsü atema ajungshibaji iba Act Section 77 kübok aibelen ka lir, moko yangluba industry-i tanurtem dak rangloker inyakba sentong tamajungji ni metetogo.  Atangji, Section 77 benokba ya alima nung tanga linük kechaia moko anema meinyakba mera ka lir,” ta shia lir.
Maneka Gandhi-isa, “Tebushitetba ka ajanga anogoshia tanur 5,000-i moko achi tenzüker, aser timba ka kari ajungshiba ajanga lir,” ta ashi.
“Study balala ajanga anojungi kanga tanur asüdang moko achi tenzükertemi moko intoktsü kanga asaker,” ta laisa ashi.
“Cigarette taseptsü nung iba atema atekümdangtsü ka inoktsütsüla. Ibaji ajanga taintemi moko achitsü atema tanurtem ajungshiba nungi tanurtem kümzüktsü. Ni amanger, kechi yimya agi südir süaka tanurtem kümzüktsüji asen teinyaktsü mapa lir ta nai ai-aura kaa melunga agizüktsü imlar,” ta Maneka-isa ashi.