May 10 nü Uttarakhand nung ‘floor test’ agitsü : SC

Dehradun, May 06 (Agencies): Centre nungi telangzüba anguba sülen Hokolbarnü Supreme Court (SC)-i May 10 nü Uttarakhand Legislative Assembly nung MLA tem tashi sayuteptsü atema lemtetogo.
May 10, 2016 nü Uttarakhand assembly nung nübo sayutepdang anüngdang 11:00 ako nungi nikongdang 1:00 ako tashi ghonda ana tema Tir yimsüsüba agiena atatsü.
SC-isa melung masüba Congress MLA 9-i parnok tangatetba nungi masetshira vote of confidence mapang nung shilem agitsü temelaba magütsütsü, ta shiogo.
Floor test inyakyim ajakji Legislative Assemby nung Principal Secretary-i achayanga video agitsü, ta SC-i ashi.
“Assembly nung tashi sayutsü atema taoba Chief minister, Harish Rawat nem temelaba agütsütsüla,” ta SC-i  ashi.
Tanep Centre-i SC dang, Uttarakhand Legislative Assembly nung floor test agitsü atema parnok renema lir, ta metetdakja liasü.
Centre sorkar nungi Additional General-i SC dang floor test atema observer ka shimang, ta mepishiogo. AG-i  Justices- Dipak Misra aser Shiva Kirti Singh nati akumba Bench dang onük ka dang asütsüla aser observer ji retired chief election commissioner ka shimtsüla, ta ashi.