Salman Khan 2016 küm tatemlen kibong akumtsüa akok

Mumbai, May 06 (Agencies): Bollywood actor, Salman Khan dang aiben ‘Na kodang kibong akumtsü (?)’ ta asüngdangdang pai kodanga telangzüba tejangja magutsüi aruogo.
Yaküm December ita nung arishi küm 50 abensasang Salman Khan 2016 küm tatemlenbo kibong akumtsü ta osang angazüker.
MissMalini.com ajanga Mumbai Mirror nung asangur ka bendangtsür ka den kibong akümtsü indang osang adokja liasü.
Iba ocet nungji “Kanga lanurbo masü aser kija alisang asangur ka taküm küm tatemlen kibong akumtsüa akok. Akumli piyong asangwa alisangi ibaji lemtetogo. Pa tetdong, bendangtsürlaji kobi melii film biz. nung tongtibang tetsür ka akumtsü ta onoki osang angazüker,” ta shia lir.
‘Kija alisang asangur’ ta jembibaji Salman Khan tetshiba asütsüa akok, aser ‘bendangtsür’ ta asübaji Iulia Vantur tetshiba asütsüa akok.
Sentong aika nung Salman Khan aser Romania-tsür TV Presenter, Iulia Vantur na aiben külemi nguogo, aser tena nüknürar lir ta aiben olulu jembia aruogo.
Salman Khan-i telemtetba agia kibong kümra pa-a Bollywood nung kibong kumer alir par züngar Shah Rukh Khan aser Aamir Khan nunger yongrüi aitsü.