DBC ya Tsüngremer asentenshi yokba senmang lir: Rev.O.Alem

Dimapur, May 06 (TYO):  Küm 40 jakdang Ao lima nungi tenzüker Nagaland nung tanüla temeshi milak aluagi asentenshi tulu adok aser nisungtem tenük agi ngua Yisu alima nung alidang atalokba kasa sayatenyatem aika atalok.
Iba asentenshi mapang nükpokertemi angu, tsüngtsükertemi jaja, tokyimra aketer marakzükteti yipten nung mejanga alirtem pongmeso aser tashidak tapu balala agi shirangertem anep. Lanurtem mangdangi ao, sentep nung tanüla temeshi agi sünga ken anishi aser ajepba agi sarasadem manentet. Lanurtem rongnung Tsüngrem bushiba aser Tsüngrem tenzüktsü mulungtetba purtem aika aküm, anungji item lanurtem züngdaktsütsü asoshi Dimapur nung Discipleship Bible College (DBC) ya tenzük. “Anungji, iba College ya Naga limai Tsüngremer asentenshi yokba senmang lir,” ta iba college nung tang teinyakdak Principal, Rev. O. Alem-i iba osangbener den sensaksemdang metetdaktsü.
Paisa ashiba agi, iba college lapoktsü atema ali den RCC ki tuluka dena International Evangelistic Fellowship (IEF) nem asentenshi mapang Tsüngremi aneptsüba nisung ka tenüng agi D.Haralu-i agütsü aser tanü iba tesem nung iba college lapoka lir aser joko D.Th, B.Th, M.Div azünger laishir aika kümogo.
“Osang tajung kaji, DBC ya ATA küpok nung college ka ama Martin Luther Christian University ajanga UGC-i agizükogo. Tetezü, DBC course ji UGC-i agizüktsü. India nung Lai bushiba College rongnung ATA ya dang university-i agizükba college kümogo,” ta Rev. O Alem-isa metetdaktsü.
Iba College kibur ya IEF asünungji, parnokia koba tashi yarir ta metetnüa asüngdang dang, “Ni Principal khu lenla nung bena atatsü jembidang, IEF President, Rev. Lanu Longchar-i kü dang teyari indang ya dang ashi,’ onok meyirijang aikati anogo shia na atema aser college atema sarasademtsütsü ako, kecha shisa mebului dang inyakangma,’ iba tashi nungji inyaker ta DBC Principal-i ashi.
“DBC ya arogo mesüra mungdang kati tenzükba masü, ibai Tanela Temeshi agi kongshia taküm nung temelenshi akartemi ano Tanela sentong züindaktsütsü asoshi tenzükba lir. Anungji, ibaibo tamangertem tanela nung aienba inyaksangshi ka lir. Parnokji DBC kibong. Tatsüba agi DBC ya Naga limai Tsüngremer asentenshi yokba senmang lir,’ ta Rev.O Alemisa metetdaktsü.
College kiojen renloka aotsü asoshi senotsü arulen lenmang karbo yanglua ali asü koda ta asüngdangdang, ” iba college lapokba mapang tamang agi dang tenzük aser tang tashi tamang agidang aor. Ano, balaka akhidangbo  tenla tenchi dang tang rongdak asoshi amshili ta asüba dak alaka sen rezüngba aser sen arulen mapa inyakbaji temenen ama bilemba tangatetba liasü. Abenjagi, DBC tenzükdang sen rezüngba mesüra sen arulen mapadong kecha metenzük südi. Takümang DBC Board-i Committee ka “DBC Development Council” ta jar tenzükogo. Ibai college asoshi osang tajung ka lir. Parnoki college asoshi mapa tulu inyaktettsü ta Tsüngrem dak teimla tulu lir,”  ta paisa metetdaktsü.
DBC a 1980 küm tenzük aser tang taoba CTC principal aser taoba ABAM Executive Secretary, Rev.O.Alemi principal mapa agizüka inyakdagi. Tang ya iba college renlokba nung shilem aginürtem asoshi lenmang sadema lapoka lir, anungji Tsüngremi kar mulungjang nung jembira menungnangi Rev.O.Alem den tongteprateptsü akok.