China-i UN nem teyari sen bn 1 agütsütsü tezüngzüktep agiogo

United Nations, May 07 (Agencies): Alima tesem balala nung yimjung lidaktsütsü, tensa azüoktsü aser terenlok lidaktsütsü maparen nung United Nations (UN) den yariteptsü nükjidong nung China-i teyari sen billion 1 agütsütsü tezüngzüktep yashi, Hokolbar nü zülutepa agiogo.
China Tir, Xi Jinping-i yaküm, 2015 küm September ita teyari sen billion 1 agütsütsü nangzükba ama, kasaji mapa küma inyaka, par linüki UN nem kümshi dollar sen million 20 küm 10 tashi agütsütsü asoshi yashi nangzüka liasü.
China-i tan agütsütsü nangzükba teyari senji UN Peace & Development Trust Fund senpongi yoktsü aser iba senji yimji yimjung lidaktsütsü aser 2030 küm tashi nung terenlok alitsü mapatong takok angutsü maparen nung amshitsü sentong lir.
“China-i nangzükba ama UN nem nungdakba teyari sen agütsütsü maparen tenzükba atema UN Secretary General, Ban Ki-moon-i China dang pelaba metetdaktsür,” ta Ban’er otongdar, Stephane Dujarric-i sangoktsü.
Yaküm United Nations nung amenba alima linük lenirtem senden nung China-i küm 10 tsüngda nung teyari sen dollar sen billion 1 UN nem agüja yaritsü asoshi Xi-i nangzüka liasü.