Asenok temenen nungsa alitsü asü ?

Mapang ka asenok limapur liasü saka Yisu Khrista taochi ajanga Tsüngremi asenok temenen nung samatsüba tia nungi kümzük. Iba taochi jagi asenok Khristan aküm. Ajisüaka, ano asenok aikati temenen mapatem medoktsütetter. Aji oda, khen mapang ka asenok temulung meyipa tzü nungbo bapti aser taküm kulia agütsü saka tanü asenok taküm libaliro tia reprangdangra temulunga kodanga memeyip ama, tzü nunga mebapti aser taküm kulia kodanga meshidang ama temenen mapatem den mepilai aliba angur. Iba ama tiaji ngur, Rom nung amangba purtem dang tenyar Pauli, Tsüngrem taochi onsara tulu asübayong asenok temenen nungsa alitsü asü (?) ta asüngdangba tongtibang o ka Rom 6 nung shia angur. Paul-i asenok nem angatetdaktsünübaji asenok temulung meyipba mapang asenok temenen takümtobo süogo, anungji iba tejenba temenen taküm tobo mali . Anungji, asenok shir temenen nung asü, idakji koda alitsü (?) ta kasa tapu nung tekong 2 nung shia angutsü. Joko, asenok ya Khristan nung taküm tasen, anungji taküm tasenba nung yabo temeneni masü saka Yisu Khristai yimsü asür. Ano, iba tesayuba ya asenok nem tali  angatetdaktsütsü asoshi Paulisa kasa Ron tapu 6 tekong 6 aser 7 nung yamai shia lir, ”  aser temenen telenba nung asenok alar süa malitsü asoshi saka temenen samatsü asoshi asen tejen nisung kangki nung angenlok ta asenoki metet, kechiyong shiba süogo, pa temenen nungi chiokogo.” Aji oda, asenoki Tsüngrem temeim memetet dang mashimashi aliba tejenba taküm to kodang asenoki Tsüngrem temeim metet aser Pa taochi agizük, iba tejenba nisung to Yisu den külemi kangki nung angenlokogo, anungji tang asen taküm yabo Tsüngrem taochi nung shia aruba taküm tejenbato masü taküm tasen lir, anungji asenok ya Khrista nung nisung tasen kümogo. Joko, asenok madak temeneni yimsü masür saka tanüla temeshi tashi aser leniba nung asenok aoer. Atangji, alima yimten nung opposition ali ama, tanüla taküm nunga opposition lir aser ibaji temenen tatidang, anungji asenoki iba temenen tatidang nemji kokdaktsüra, asenoki Yisu Khirsta kangki nung angenlokba ajanga asenok temenen nungi kümzükba taochi amajok kümdaktsür. Tsüngrem taochi ya asenok den teti lir, iba jagi asenoki tatidang timtem ajak akoker.Yisu Khrista den Tsüngrem taochi teti dena aliba agi Pai pa atalaba, Pa dak azükba aser Pa kangki nung angenlokba timtem tatidang ajak koktet. Tsüngrem taochi agidang asenoki inyakba temenen ajak to asen dang tai adok. Iba taochiji asenoki jungjunga angatetra asenoki Tsüngrem anema tai memenatsü. Tsüngrembo onsara tajung aser taochi tulu akasang, anungji tai menapet menayonga kecha masü ta masü, saka kodang asenok dak Tsüngrem taochi lidir, iba taochiji asen temenen dang nungi tuluba, anungji temenen tatidang ajak kokadoker. Iba takok manung asenok temenen madak takoker akümer. Khrista nung takokba ta asübaji ibaji lir. Aji süaka ,takoker nokinketer memesük asenok taküm nung tashimait kar danga lira aser Tsüngrem taochi agi kümzükba nisung tasen memesüki lia lira, Tsüngrem taochi ano khen bilemtettsüba mapangji tang lir. Tsüngrem taochi ya asenokibo temenen menapet menatsü saka Paibo tai tokpet adoktsü ta asüba mapa ka masü saka alima nung temenen tongpang kokyonga aotsü asoshi tashi tasen anguba mapa ka lir. Tsüngrem taochi alibayong, Pai kodanga asenoki mekoktettsüsa tatidang majurudaktsür. Tsüngrem taochi alibayong tensa tia ajak nung aseok pelaa alitsüsa tepela molungjang Pai asenok nem agütsür. Tsüngrem taochi alibayonga asenoki tangar dang mejashir aser taidoktetter. Aji oda, kechisa tajung asen taküm dangi arur, item ajakji Tsüngrem taochi ajanga arur. Aji oda, asenok asoshi Tsüngrem taochiji bank nung kodanga magimatsüsa sen rezünga  yutetba amai lir. Iba jagi, Tsüngremi asenok dang ashir, kechi tia nung kong lidir liang, Pa taochiji asenok asoshi teperi.