Abdul Kalam asüpila sentong tanü Rameswaram nung agitsü

July 29, 2015: Taoba mapang linük Tir Abdul Kalam tasümang AFS Palam, New Delhi nungi Rameshwaram-i bener aotsü lia sepai tongi ketdangsertemi asür nem akhüm agütsüba noksa nung angur.

New Delhi/Chennai, July 29 (Agencies): Brihostibar nü taoba mapang linük Tir APJ Abdul Kalam den tatembangbuba asüpila sentong Rameswaram nung agitsü aser iba sentong nung Ato kilonser Narendra Modi adentsü.

Iba dak sentakba tasüngdangba ka langzüdang Union minister Venkaiah Naidu-i, “Ato kilonser arutsü,” ta ashi.

Palam technical area nung osangbenertem den jembidang Naidu-isa, iba sentong nung chief minister tema kar adentsü, ta ashi.

Ato kilonser anepongi tonga arutsü aser anüngdang 11:00 ako meta asüpila sentong nungji adentsü, ta osang ka ajanga ashi.

‘Missile man’ ta ajasang aser highest civilian Award, Bharat Ratna angur nem tetushi agüja Modi-i, “India atema sentilong ka samaogo,” ta ashi.

“Asen scientist-Tir, aser nüburtemi keta-sena meimsangi takokji kodanga rongsen ajanga masadang,” ta Modi-i ashi.

“Pa asoshi, sensak tia anema noktaktsüji scientific aser tamangbaren naprongla nung shisatsüji rongsen liasü,” ta Ato kilonseri ashi.

Kalam ji, alima dang nungi tera dang agisang saka pai akokba ajak alima nem agütsüsang liasü ta bilemtettsü, ta Modi-i ashi.

Ano tanga osang ka nung, Tamil Nadu chief minister J Jayalalithaa bo temang majungba yong Dr Kalam tatembangbuba asüpila sentong nung medentettsü, ta metetdaktsü.

“Ni Kalam kanga akümtsübur. Ni asüpila sentong nungji dena akhüm agütsüner. Ajisüaka ni temang majungba yong ainlen senzütsü makoktsü,” ta tanü Jayalalithaa-i sangdong ka ajanga ashi.

Asüpila sentong nungji lka medentetaka lai lar minister tem- O Panneerselvam (finance), Natham R Viswanathan (electricity), R Vaithialingam (housing), Edapadi K Palaniswamy (highways), P Palaniappan (higher education), S Sundararaj (youth welfare & sports) aser R B Udayakumar (revenue) nunger oa adentsü tuyuogo.

“Par kinüngertemi mepishiba nung ajemdaker kü tetuyuba nung tasümang aremtsü asoshi sorkar ali shimogo,” ta Jayalalithaa-i ashi.

“Tetsü tasoli, Tamil nung sojasor ka asüba ajanga ni kanga jashir,” ta laisa shisem.