T.R Zeliang-i Tetsütem Anogo salem abener

Dimapur, May 7 (TYO): Nagaland Chief Minister, TR Zeliang-i Naga nunger tetsütem ajak dangi Mothers’ Day salem metetdaktsü aser pei pei kibong den loktiliba asoshi mapa tajung inyakba atema tetsü ajak nem tenüngsang agütsü.
“Ojalatemi timtem jenti arema aser bendanga agüja asenok tajung kümdaktsüba atema asenoki tanü parnok nem tetushi agütsütsüla aser pelaba metetdaktsütsü tim,” ta TR Zeliang-i ashi.
“Tetsütem pei tanurtem asoshi mapa inyakba, la teka tanep, tanurtem atema la senti nüktzü ayimba, tanurtem tarutsü atema shisabuluba, kibong temeimtep nung alitsü atema lai süoki ia bilemtsüba aser mapa tajung inyakba, item ajak atema tanü asenoki ojalatem dang pelar ta ashitsüla” ta chief minister-isa ayongzük.
“Tanü asenoki ojala nem sempet, naro, chiyungtsü, sentioset, mitai amala agüja Tetsütem Anogo amungdang, Tetsütem Anogo ya tetsürtem anema mapa inyakba anendaktsütsü aser ozüng alema mapa inyakba agientsü nükjidong nung ayongzüka amungtsü tenzük ta asenoki bilemtetdi. Tanü Tetsütem Anogo ya khenyongi balaka südaktsüdi, asenoki ajaki asen ojalatem bilemtetdi aser parnok tenüng nung asen loktiliba nung temeim, yimjung aser aria bilemtsütepba agi süngdaktsütsü merangdi” ta TR Zeliang-isa ashi.
“Ojalatem peladaktsütsü atema asen loktiliba nung kati ka anemtepba, tamajung bilema mapa inyaksangshiba aser tesempatep agiendi ta ayongzüker”  ta Chief minister-isa shisem.