B’desh nung Jammat lenir tasüba agi memerenshitsüla ta lungkak aiter

Dhaka, May 8 (Agencies) : 1971 küm nüjiso atema raraba dak sentakba nung par lenir tasüba agi merenshitsü ta Supreme Court-i obendang agütsüba anema Deobar nungi tenzüka Bangaladesh nung Jamaat-e-Islami telok-i ananü lungkak aitba sentong ka ayongzükogo.
Jamaat-e-Islami Tir Motiur Rahman Nizami-i court dangi temepishi shiti ka züluba magizükba ajanga par teloki linük rangben nung gondha 48 lungkak aitsü ayong.
Jamaat telok nung 2000 küm nungi tekolakba, Nizami tasüba agi merenshitsü obendang agütsüogo aser par teloki iba temerenshi agientsü atema temepishiba shiti ka court dangi züluba magizük, anungji joko pai dak nungi iba temerenshi agientsü atema linük Tir dang mepishidangtsüba dang anünga lir.
Parnoki linük rangben nung lungkak aita mokdangtsü sangdongaka Dhaka nungbo akhi ama gari aser nisungtem jaja liasü. Iba den külemi ano tanga yimtitem nunga iba mokdangba ajanga kecha balaka timtem magütsüi teti ama kasa gari aser nisungtem oli aruli jajaogo.
Dhaka nung Deobarnü shishilembadak tesem ajak akhi ama kasa mapang nung lapok.
Arishi küm 72 tain, Nizami ya Khaleda Zia cabinet kübok 2001 nungi 2006 tashi agriculture & industries minister inyakogo.
Nizami nem ochi obendang magütsü, ta par telokibo ashir ajisüaka sorkari pa taitsütsü tim nung aitsü ta shiogo.
Nizami ya Jamaat telok nung tekolakpur lir aser 1971 küm nüjiso atema raraba mapang aibelenertem pua tapet temerenshi agütsütsü atema 2010 küm Ato kilonser Sheikh Hasian-i tentetba sorkari aniba telok, Bangladesh Awami League-i pa dak aibelen ana puteta iba obendang agütsüba lir.
2012 küma Nizami ya rakzükraktemba, nisung aika khen nung tepsetba, nisung aliba tesem rongtsüba, tetsür tashiyim agi raksatsüba aser tashiyim agi nüburtem Islam amangdaktsüba aibelentem nung aija liasü.
Pa aitsüba osang ajanga ashiba agi, pa ya rara mapang Pakistan army den lokteper Bengal nunger shisakartem tepsettsü sentong atonger telok, Al-Badr nung tongtibang nisung ka liasü aser parnok sentong ajanga East Pakistan pakzüka ao aser tang aliba Bangaladesh nüjiso angu.