Tiyazülong aser taila taküm

Tanü linük shirangba tashidakji ochimashiba tashidak agi kangshir ta putetter. Ibayongji linük nung BJP teloki anikba sorkar kümli nungi taoba sorkar mapang ochimashi inyakba mapatem kakshia putettsü merangba angashir aser angur. Aji oda, tang tebushidak aser tejembidak ken o ji taoba sorkar mapang Italy nungi tayimtsü aliba maparen nung sübokrem agiba indang jembir. Iba amaji linük nung senotsü nung ochimashi mapa inyakbatem zünger mezüngma aser bushir mebushima alitsü. Iba denji kasa Nagaland nunga sorkar nung yimsüsür aser ketdangsertemi senotsü nung ochimashi mapa inyakba agi nübortem kangshiba tenük agi angur. Ajisüaka ochimashiba ya senotsü amshiba nung dang masü saka pei pei jakla yimya aser taküm kuli nung dena lir. Item rongnung tang linük nung tejembidak taaktsü o kaji prime minister-i anir Chief minister tashi aluagi tiyazü tazüngba degree amshiba ken o ya asütsü. Aji oda, Delhi chief minister-i aija metetdaktsübaji shitak asünungbo prime mimister Narendra Modii pa graduate süogo ta election-i aiba mapang nung amshiba kuliji tiyazü asütsü. Iba kasaji, aruagi Nagaland nunga chief minister T.R.Zeliang-i pa graduate ser nung graduate süogo ta amshiba taitsüba ken o asenoki angashir. Ano, paji dang masü saka taoba chief minister aser tang Lok sabha nung tatar Neiphiu Rio-ia pa graduate asüdang Honours maginung agiogo ta election-i aiba mapang amshiba asoshi taitsüba ken o tepdaka lir. Item ajakji shitak asünungbo parnok ajakji tiyazülong aser taila taküm asütsü. Aji oda, nisung kati pei tazüngba degree amshiba nunga ochimeshitetra tanga maparen nungbo ochishia inyaktsübaji meimlar. Tanü yimjak nung tejembidak ken oji itemji asüba agi parnokji tatishitsü ka ama iba yimobilem nung amshir dang ashi, parnokji dang masü saka asenok ajak dak pei pei yari ochimashi jakla aser mapatem peria lir. Atangji, Laishiba nung shia aliba ama, ochi agidang asenok ya nüchi akümtsü alinung, yimsüsür aser ketdangsertemi ochishia inyak nung dang ali nung anak mezüa nisunga masü aser shirurua masü ta alir nübortemji tereprangtsü sorubangru nunga aser libaliro nunga nisung mesüka nüchi akümtsü. Ajisüaka, tanü asenoki asenok tenüng amshiba nunga ochimeshitetra mesüra asenoki asenok tazüngba degree amshiba nunga ochimeshitetra, asenok office nung mener sen crore jenjang telemtetba agidang mesüra mapa inyakdangbo kodaser asenoki ochishitettsü. Tanü asenok asoshi tebilemtsüji aji lir. Ochi agi dang yimten nüchiso dena bener arutettsü ta amanga mapa agi sayua inyakba yimten yimsüsürji Mahatma Gandhi liasü. Paibo, India yimten nüchiso angutsü atema pa school tanur asüdang aibelenba tai tilateri ajak yimjak nung nangzük.Ibaji nübortem asoshi nüchiso atema raraba tongpang nung pa meyong raraba hadir tesashitibaji liasü. Tanü asenokbo electoral roll nungi tenzüker, tasoba anogo tiyazü, degree tiyazü, mapa inyakba tiyazü, tejembiba ajunga tiyazü, project ajak tiyazü, yimten maparen ajak tiyazü aser tiyazü agi sünga lir. Asüng Nagaland jungnüra joko asenok item tiyazü lima nung jagi pilatsüla. Joko, lanurtembo iba tiyazü lima nung ojang alitsüla aser asangsang aser ochiba lima nung alitsüsa temelenshi ka bener arutsü atema tanü takoksa aser timtem arema inyaktsüla.