AgustaWestland ken o nung Modi-i Congress aitsü

Kanyakumari (Tamil Nadu), May 08 (Agencies): Deobarnü Tamil Nadu nung Ato kilonser, Narendra Modi-i AugustaWestland ken o nung ajemdaker Congress Party sashia aitsüogo.
Tamil Nadu Assembly election atema BJP nüboyim sentong ka nung Ato kilonser Modi-i, “Coal (block allocation), 2G aser 3G nung ochimashi liasü. 2G aser 3G ochimashi ken o, ochimashi jenti nung ajemoka alir ketdangsertem (Congress) yangi lir.  Linük nübur ajungai ibaji meteta lir,” ta ashi.
Congress aija Modi-i, “Tawa-tanü nenoki television channel balala aser osangkakettem nung, parnoki helicopter aliba nungia sen agi ta angur. Iba o ya onoki jembir masü saka Italy nung aliba court kati jembir,” ta ashi.
Ochimashi malitsü atema NDA sorkari mera ka nungi ka ta agir ta shia Modi-i, Delhi nung sorkar küm ana abensatsü aliba par sorkar anema ochimashi kata tonglokja mali, ta ashi.
“Ni terenlok atema inyaker aser Tamil Nadu nunga terenlok mapa inyakner. State lanurtem tia yangertsü atema ni nenok dang, khen iba party aser khen danga party ta asüba yimya intokdaktsüner. BJP nem maongka agüjang. Onoki nenok tia melenshitsütsü,” ta Ato kilonseri ashi.
“Nisung jenti adenshiba ajanga kuli anguba kaji- BJP-i takok angutsü ta ni jangjar. Onoki nenok temoatsü agitsü. Terenlok atema vote agüjang, Tamil Nadu tia melentsü atema vote agüjang aser state nung aliba lanurtem tia atema vote agüjang,” ta pai mepishi.