Govt. School ajungtsü teimla

Nagaland nung sorkar school majungba indang kanga jembiba agi joko sorkar school-tembo kodanga shia marutsü amai bilemtsüsa kümogo. Iba jagi sorkar school nung sayur tesayurtema nümamedangi kümdaktsür aser tezüngdak pur kaketshirtema tezüdangdaktsür. Ajisüaka, teimla kaji sorkar school ajakbo tamajung masü. Aji oda, taküm küm HSLC tatidang nung takok angurtem rongnung mark 80% tema angurtem rongnung trokbo government school nung azüngertem liasü. Iba ama terata tensa tia ka nung Nagaland School Education & SCERT secretary, F.P.Soloi taküm küm dang nungi sangküm sorkar school result tajungba asütsü ta metetdaktsübaji osang tajung ka lir. Aji oda, tanü tensa Nagaland nung sorkar school majungtsüsabo kecha kulia mali, kechiyong sorkar school ajak nung tesayur tajung peria lir. Atangji, school kar nung tesayur peria malibaji tesayurtem agi meperiba agi masü saka school kar nung tesayur talila yoka aliba agi asütsü. Itemji School Education department-i temulung agüja inyakra school kecha nunga tesayur agi meperiba tebilemtsü malitsü. Tang School Education kübok RMSA ajanga tesayur 500 dak tali shimogo. Itemji tatidang jungjunga agir shimba tesayur tajungtem lir. Aji oda, tesayur tajungtemi sayuba school majungtsübaji kecha kulia magütsütettsü. Asenoki aiben sorkar school majungbaji tanurtem dak atonger, kechiyong tanü sorkar school nung azüngertemji sensaker makamaitertem kibong nungi teimba lir. Ibayongji, sorkar school ya sensaker azüngba school amato asenoki bilemer. Ajisüaka, takartem kibong nungi aruba tanurtemji sensaker kibongtem nungi aruba tanurtem dang nungi mechiraba ta masü, mesüra takartem kibong nungi aruba tanurtemiang takok jenjang tajungba angutsü ta masü. Küm shia class 10 aser 12 result adokdang tematiba jenjang nung takok angurtemji reprangdangra sensaker aser tilar kibong nungi dang asütsü. Aji oda, asenoki sensaker chirnurtemibo lesson makoktsü amai bilembaji parnok mezüngmeshia jembir asütsü. Asenoki Nagaland nung sorkar school majung akümba tera aser kuli bushidanga odangra, küm ishika jakdangbo tesayurtem ya MLA aser minister-temi maginüra talanglangi transfer odakja merenshi, iba jagi tesayurtem aika tezüdangdaktsü aser school-tem akoksa, tanübo iba amaji election sülen tesayurtem mezüngmeshiba kangabo mangur. Ano, sorkar school majung kümdaktsüba kuli kaji tatidang magii tesayurtem shim aser tatidang agiyonga talanglang result magütsütet, anungji tesayur tajung-majung mebendangteti mashimashi shima sayudaktsü. Atangji, tanüa tesayurtem  shimba maparen nung aiben timtem ajuruba angashir. Joko, imlaba ama sorkar school jungnüra tesayur shimba maparen nungbo kinunger pi ta mali, ruling aser opposition ta mali, tatidang jungjunga agir shimtsüla. Tanü asüng tesayur inyaktsü shimba lanurtem aika jungjunga azüngba, sempet aketba aser sayutsü jangraba purtem lir. Itemji tezümedangdaktsüi sorkari ajungshia sayudaktsü nungbo sorkar school ya manger sangwa nung junga adoktsü. Tang tesayudak tesayurtem rongnunga bendanga agüja sayur tesayurtem aika lir. Parnok jagibo school senshir külena nüngdakba tanurtem nembo angati mapang talila agia sayuner. Item tesayurtem jagi kenü school-i mao maremer, kechiyong parnoki tanurtem dang lesson sayutsü yongyar. Item tesayurtem jagi parnok sen agi class nung tanurtem nüngdak alitsür. Iba ama tesayurtem jagi parnoki sayutetba tanurtem ajanga asen limai memenui temelenshi tajung ka bener arutsü teimla tulu lir. Atangji, tulurtem amendak nungi tenzüka school tashi aluagi inyakyim ajak raksadoker asünungji, pei linük asoshi taküm bendanga agüja tenzüktsü tangatetba melira, tatidang arudang tsükadoktsü, Tatidangji, tanurtem tenüng nung miimzüka senotsü agizüka achitsü lenmang kar angutsüa akok, mesüra school-i maoyonga ita sen agizüka chitettsüsa lenmang alitsüa akok. Item tatidang nung taintem aika tsükogo, iba jagi tanü sorkar school majunger. Ajisüaka, lanurtem dak teimla tuluka lir, kechiyong parnok asoshi sen masü tanurtem takümjiang tongtibangba, item jagi asüng asen lima jungjunga yanglushia anitsü.