Tetsü Naklu

– T. Asangla Imchen (Aliba) Aoyimti, Dimapur.

(Nia tetsü ka, kütsüa liasü, kütsü tetsüa liasü…..tetsüsa tetsütem ajanga ajioda ali meimchir soyapokya. Item tetsütem naklutsü tetemsü asünung tongtipangsa aluyimer tetsütemi abenba khuret bilemteta tetsütem nakludi).
Iba alima nung nisung tebur tetsür jenti lir, saka alimai pei lima dang tebu tasoli ta masü, TETSÜ TASOLI ta ajar. Anungji ojalatem, alima tetsüji na lir, takotet yimsüsür tetsü na, nokinketer walunir tetsü na, ali telung aser tzüyim telung senti osettem bushiteter tetsü nasa, anüngtem nung mopung nung yima senzüa meimchir süngmangdaktsüba tetsüjia nasa, anüng temalen tuagi alima tasen bushiteter tetsü na, temeket ajaklen meimchir ajunga bangkaa okmangdakji sayatenya mapatem inyaka senzür tetsüjia nasa lir. Oh ojalatem, ne konang alimai masemer. Ner jabaso jalatem alima sünga prokshir aliba topur tajung angu dang Canan lima penzü den medemdangtsü akoker. Ibai ne rongsen aser ne naroküm.
Metsü tsüngkümwa mapang ka süngjanglijang metsü ajaki arakzüa mokoteta adoker larnok tetsü ALIMA nem tetushi ola ayimoktsüba tsüngküm, tenem aser ungsem kolaktem ajak nungi ayongnutem nung tzü tasen ola agi la yimdak lima naklua tsüngsanga ayimba mapang ka den sütepa ne jabaso jalatemi na khati  dang na nungi jakzükba metsütem indang nai shsiadangdima? Au, parnoki na meketa tsüngsangtettsüsa süradong ama nai parnoki mesütet.
Ojalatem, ne temeim asadangtsü alima nung oset kecha nguteta melika. Alima nungi anü tashi mile million 93, ta asateter yua kar; alima teyongtsü telung külen nungi külen tashi mile 7,926 ta asateter kar; anüng ali tsüngda nung aliba osettem ajak ainket mapa inyaktertemi asatetogo. Saka tanü tashi ojalatem meim asadangteta mali. Au, tarutsü lanu putuia ojala meim yabo masadangtettsü.
Ni kinü alidang ayaterem teyiprong asükwa mapang asüktema ajep danga menürema ola tanük agi mesüzükla, aji ojala. Ni shiranga ali dang kü dak nüktzü yimloktsür senti mozü achiba dang nungi tajungba anepadok. Ni tashi mangai kütsü anema mapa tamajung inyak danga kenkenbosa tejak mekümtsü melena Tsüngrem o agi ni sayutsüngi. Ni school nung takok angu dang tepela agi ojala kena mena melitet. Kenken tamakok angu dang ojala kena amuoa mao ni atema shisa atemer aser lenmang tasen sayur.
Akümli wadang nungbo ojalai abenba khu yasa tarettiba; oda Yisu kangki khuret den medemdangtsü langa lir. item khuret ojala-temi yimya khuret amai dang aben. Ajiang, alima ajunga nung taochi kaktiba Roman temerangertemi tepsetba Yisu kangki anasai netsüng rongnung Peter-iangsünga moutet. Saka tetsürtemi kangki anasai orr jepa noktak. Ojalatem, aria bilemba molungsentsü koda tulu nenok dak lir.
Anogo tepiyong temang nung tashi terakata mekai anü tesashi agi terongdong pokmaa pudaktsür lia mopung tesashi yipru agi onshi dang tera agi dang melaoi lia, chiyong shizüka ano tsünglupo kati la dang ajaloktsür. Idangjia lai kü indang bilemdang, achiajem den saku kümer anogo süa wadang nung noktak. Ibai ni mesütsü atema okrongba lir. ilungseta kodang ki bushi, tedi-i tenu ponger kima-i alua ayimtena atar: “Oja, kechi aben?” Ojalai tachitsü oset kecha mebenka menürema ken dang rangloktsü nung tsüngsarosa anogo nung lozü mejaka ayongbangtzü ajem ama onok tipatemer.
Shi azü ajak roseper adoka koanung danga ayipjanga memejangtsü; kechiyong, aonung sangwaa ni jepjen ajep. Lai ashir, tebusang, tenüla, ne dang ojalai ajazü naro, ta jadikor tejep. Aonung sangwaa kü den jembi jagi temejang shizüker, an akhongba ola dang angaa atar ni ajunger saaka ken tena la sorochiok asür. Anepdang züngia lia ni toktsür aluleni yiprumopung tsünglupo aser taochi maka anü nem merenshidaktsütsü chitem tesa tila ka bener among kübokji ayaoka temsener. Oh! Aji temeimtsü taküm ojala.
Ni sashia shirang dang mesüra ajungben lendong kati meketbang dang, oba, ta masü, oja ta jaadoker. Ojalatem, nenok temeim idaki tali jungkai adoker. Alima aser idakji aliba teyangluba aser yimya rongsen ajungai ne dang mera taket oja, ta ajar. O kibong naro ojalatem, nenok dang TAMAREN TETSÜTEM, ta maneni jadi.