Rahul tepsettsü amokmeren, Congress-i Home Minister ajuru

New Delhi, May 09 (Agencies): Congress tatong Tir, Rahul Gandhi tepsettsü amokmerenba sülen tanü Congress lenirtem teshimtet telok kati Home Minister, Rajnath Singh ajurua pa dang Rahul Gandhi nem security junga agütsütsü mepishi.
Congress Tir Sonia Gandhi atema Political Secretary, Ahmed Patel, Treasurer Motilal Vohra, Rajya Sabha nung Congress Deputy Leader, Anand Sharma aser Rajya Sabha MP, Rajiv Shukla nungeri Union Home minister, Rajnath Singh ajurua Rahul amokmerenba indang osang metetdaktsü.
Senden tembangba sülen  osangbenertem den jembidang Sharma-i, “Home Minister-i tekaratiba nung security atema inyaktsü ta onok dang shiogo. Paisa onok dang, amokmerenba osangji Centre aser state tem indang agency tem aser SPG nem metetdaktsütsü ta shiogo,” ta metetdaktsü.
Home Ministry ketdangser kati ashiba agi, iba senden tembangba sülen Rajnath Singh-i Home Secretary, Rajiv Mehrishi dang ibaji süoki ia agisü aser Rahul nem security takhang agütsütsü atema  tuyuogo.
Special Protection Group (SPG) sepaitemi Ato kilonser, Narendra Modi, taoba mapang Ato kilonsertem aser parnok kibong züngsemtem anüker. Iba den külemi Congress Tir, Sonia Gandhi aser lar chir ana – Rahul aser Priyanka Gandhi nata SPG sepaitemi anüker.
Tenüng zülua maliba amokmerenba shidiji Tamil oshi nung zülua alir aser iba shidiji May 4 nü Pondicherry nung post asü. Asüng Rahul-i Poducherry nung Karaikal semdanga lokti senden ka nung jembitsü sentong lir.
Iba shidiji UPA sorkar mapang PMO atema minister, V Narayanswamy dangi yok aser shidi nungji Pondicherry nung industry tem shibangbatsüji Congress Party ajanga lir ta shia asüng agitsü aliba senden nung Rahul Gandhi pokseta südaktsütsü ta amokmerena lir.