May 13 nü Naga-Asom 2buba round table senden alitsü

Kohima, May 9 (TYO): Asom Sahitya Sabha aser Naga Hoho kübok Assam aser Naga mulungtet teloktem May 13, 2016 nü 2 buba Round table meet alitsü.
Iba sentong ya nikongtsütsü 2:00 ako nung Hotel Japfu, Kohima nung agitsü aser tongti o jembirtemji, Nagaland nungi social activist mongin Niketu Iralu aser Asom Sahitya Sabha President, Dr. Druva Jyoti Bora na asütsü.
Sentong nung tongti tesemdangerji Ex-Minister, Tiameren aser tetushi süa jaokerji Housing Parliamentary Secretary, Er. Levi Rengma na asütsü.
Iba sentong ya shilem ana lemsar agitsü- ka Introductory aser ka Technical alitsü. Round Table sentong tembanga chiyungtepba mapang agitsü aser iba nung arrtsü anasa aliba district tem nungi MLA tem adentsü.
Mezüngbuba Asom-Naga Round table ji October 9, 2015 nü Guwahati nung agia liasü aser iba mapang kidanger state ana tsüngda tesentaktep akangshitsü aser amalitep alitsü bangjemtep.
Iba senden nungsa Art, literature, culture, trade aser commerce tsütsü state ana tsüngda inyaksangshitsü, lipoküm kümzüka ayutsü aser arrtsü ken o angatetteptsü atema tenangzükbatem agitep.