Philippines sorkar tasenba den amaliteptsü imlar: China

Beijing, May 10 (Agencies): Philippines sorkar tasenba den amalitepa inyakba ajanga par linük ana tsüngda adokba South China Sea (SCS) den sentakba mangatettep ken o benteta par linük anati aroki terenlok angutsü imlaba olen ka China-i tanü, Mongolbar nü metetdaktsüogo.
“China-i Philippines sorkar tasenba den amalitepa nungdakba maparen ajunga inyaktsü mulunga lir. Ajisüaka, ozü linük ana tsüngda adokba mangatettep ken o bentettsü asoshi Philippines-i lenji arutsüla. Yamaji inyakba ajanga dang ozü linük ana tsüngda tanaben sentaktepshitettsü aser arok terenlok litettsü,” ta China foreign ministry otongdar, Lu Kang-i metetdaktsü.
Paisa ashiba agi, akidang nungi China aser Philppines linük na tsüngda tesendaktep junga aru saka tawa SCS ken o adokba ajanga par linük ana tsüngda tesendaktepji mejungi akümtsüsa tia ajurua lir.
China-i par meyong ta züngshiba SCS den sentakba ken o bentettsütsü asoshi Philippines-i UN nunga ken o benoka lir.
Ano külen, “China lenirtem den tsüngdong ajurutepa ozü linük ana tsüngda adokba mangattepbaren bentettsü alizüng lir,” ta tawa agiba Tir election nung temaba jenjang ngua alisang, Philippines Tir candidate, Rodrigo Duterte-ia metetdaktsüogo.
Ajisüaka, jembitepa ajanga par mangatettep ken oji mebentetra, China-i SCS tzüyim nung tentetba asetkongi tsüngdong oa idakji par Philippines linük wako songa yutsütsü amokmerenba olen ka Duterte-isa sangoktsüogo.
Duterte-i election nung takok ngua Philippines Tir menden abentsü jenjang ngura, ibaji China asoshi osang tajung alitsü kechiyong tang Philippines Tir menden abensang, Benigno Aquino III-i China anema nokdakba amabo Duterte-i China anema menokdaktsü akok.