May ita atema Dimapur DPDB senden amen

Dimapur, May 10 (TYO) : May 2016 atema Dimapur district DPDB senden May 9 nü Deputy Commissioner Dimapur conference hall nung menogo.
Iba senden nung mendenji Dimapur DC, Kesonyu Yhome liasü aser pai tesentepertem ajak pela agizük. Iba sülen Fishery, Irrigation aser Flood department temi departmental presentation agütsüba mapang liasü.
Senden nung onük benokbatem rongrong, Chekiye village nung Spring Valley School lapoktsüba, Rinchio academy, Sovima middle school nungi high school Upgradation, aser Sovima village nungi Tenyiphe village-i Noah’s ark international school belentsüba densema liasü aser item onük ajak bangdakpur dangi abentsü lemtet.
Senden nungsa Dimapur DC-i, kümshia June 5 nü ‘World Environment Day’ amunger aser taküm June 5 ji Deobar amshiba agi June 4 nü iba anogo amungtsü, ta metetdaktsü.
Iba dak sendakba nung lokti nübodoka mapa inyaktsü aser iba nung department ajaki shilem agitsü ayongzüker, ta DC-isa shisem.
Ajungben lendongtsüdong atalokba mapang Dimapur district jenbutsüsa renema mali aser iba dak sendakba nung District Disaster Management Committee-i sentongtem ayongzüka agir. Anungji, Nagaland State Disaster Management authority-i ayongzüka agiba training tem nung ketdangsertemi tangar meyoki pei arua adentsüla, ta DC-isa metetdaktsü.
Taruba ita BPDB senden nung Chief Wildlife aser Medical department temi departmental presentation agütsütsü atema mapa lemzüktsü.