Turkey mitkartemi IS kiralongrar 3000 shi tepsetogo: Erdogan

Istanbul, May 11 (Agencies): Turkey mitkartemi Islamic State (IS) ta ajaba kiralongrar 3000 shi Syria aser Iraq na nung tepsetba osang ka Turkey Tir, Recep Tayyip Erdogan-i tanü, Bodbar nü sangoktsüogo.

“Ozü mitkartemi Syria aser Iraq na nung IS züngsem 3000 shi tepsetba osang bushiteta lir. Tanü tashi nung alima linük katidanga ozü mitkartemi inyakba ama inyakteta mali,” ta shia, par linüki IS telok pusema nungiter ta aitsürtem nem Erdogan-i telangzüba agütsü.

Turkey yimtiba, Istanbul nung amenba Balkan nations’ military chiefs senden nung o jembia shilem agidang Erdogan-i tanü iba olenji metetdaktsü.

“Ozü Turkey linüki IS telok pusema nungiter ta aitsür aika lir. Ajisüaka, ozü Turkey-i IS züngsem timba tepsetba aser IS den sentakba khuret ajuruba amabo linük tangai ajurua mali,” ta pai nenshia ashi.

IS kiralongrar telok anema raratsüren nung North Atlantic Treaty Organization (NATO) nung züngsemba Turkey linüki US-i aniba alima teloktep telok den kanga nungnanga züngsemogo saka IS züngsemtem Europe tonga modaktsütsüsa par Turkey-i arrtsü junga manüker ta shia, Turkey aija lir.

Ano külen, par linük talisa, Syria arrtsülen densemba tesemtem nung IS telok anema takok ngua raratsü asoshi par linüki West teyari nungdakba olen ka Turkey sorkaria metetdaktsüogo.