Tetsütem Anogo Sangro zünger shisadanger

–  T. Nükshi Yaden, Tuli.

Naga lima nung osang kakettem nung ojalatem anogo sangro zülutepba zünga- zünga kanga khurema ajeper. Ya kechiba ajeper nenoki meteter ma? Ojalatem nenoki nenok atema bendanga agütsüba ya onsara ulura. 2009 küm Municipal Election aser Town Council Election agitsü lia ojalatem nem 33% magütsüba ajanga Nagaland nung Municipal 3, Town Council 20 kibur maliba tsüki ama kümogo. Iba mapa yabo tsürabur tetya tetsür dak yimli mali ta tetya ya asangsang nung ataloker asü, 2004 Nagaland nung Municipal aser Town Council meyokteper Town 19 nungi elected member 229 rongnungi anarongtena ojala ka densema la nem chairperson lemzüktsü ani, onsara tia maka maksü ajurua la menden nungi alutsüsa ajuru. Ojalatem!  teburtemi nenok medensemba ajanga langka medokmeperi inyaksema ali ama bilemer asü? 24th April 2003 küm Watsü mungdang alidang ojala watsü Banuo Z Jamiri-bo asenoki 33% reservation atema raratepa kazü melen asenok tetsürtem kechi metokmeperi anünga ali itemji tama angatettsü merangdi. Ojalatem, iba o ya tebur dang tetsüri yimli abentsü tim o liasü masü no?
Aji oda, yimliren tsütsü tanti Nagatsürtemi mebilemdangi obala tem dang yimli mesayutet ojalatemi nenok temeten tsütsü rangloker bushitepdang asen Naga lima küm 7 tashi langtsüngi talangka luogo, aser aji mapang talangka lua marutsü.
Ojalatem, tanü nenok nem kunang nüngsang jenti agüja züluba sangrotem azüngdang tetsü ka dak ya tashi Temeim, Aria bilem, Alima asoshi teti khuret abenertem, Nenok nüktzü agi alima alangzüktsüpurtem, Nagalima yi tongpang nung taküm bendanga agüja noktakertem. Tanübo koda, asüng tarutsü lanu putui ojalatemi ya tashi sayangtet no ta nenoki inyakba otsü azüngtsü. Aji oda süaka, ano yimliren tsütsü inyaktsü mapang kecha temenu mali. Anungji shin o nung ashi ama, “Kecha meinyaki toktsü dang nungibo menur süaka inyakbasa tajungba,” ta asüba to lua arua bilemdangdi.
Ojalatem, joko nenoki aginüba ama nüri temeten bener arukaji nenok ano teinyaktsü khuret tuluka lir. Tekeraba nung mapa küma aotsü aser tetemsü tetsütem asen lima yanglutsü bendanga agüja nangri kangshir aramesoang ta khu khua sangoktsür.