Arjuna Award atema Raghunath aser Ritu na tenüng benoker: HI

New Delhi, May 11 (Agencies): India nung saisapongtsü sabang nung takok tulu angur nem agütsüba tematiba sempet, Arjuna Award agütsütsü asoshi India’er tetsür hockey team captain, Ritu Rani aser tebur hockey asayar 2 – VR Raghunath aser Dharamvir Singh nunger tenüng benokogo.
“Arjuna Award agütsütsü asoshi VR Raghunath, Dharamvir Singh aser Ritu Rani nunger tenüng benokogo,” ta Hockey India (HI)-i tanü, Bodbar nü sangoktsü.
Major Dhyan Chand Lifetime Achievement Award atema Sylvanus Dung Dung aser Dronacharya Award atema coach mongin, CR Kumar tenüng benokba osanga HI-i metetdakja liasü.
“Tan tenüng benoker hockey asayartemi India asoshi taküm bendanga agüja aser takok ngua shilem agiba nüngtem nung parnok tenüng nungtugu sempet agütsütsü asoshi benokogo,” ta HI nung secretary general, Mohd Mushtaque Ahmad-i osang jangjashitsü.
Tesüiba hockey asayar, arishi küm 70 tain Dung Dung-i takokba goal agütsüba ajanga India teloki Spain telok madak takok ngua 1980 küm Olympic gold medal agizüka liasü.
Raghunath-ia 2005 küm nungi tenzüka tebur senior hockey telok nung züngsem aser pa densemba India’er hockey teloki 2007 aser 2008 na nung Sultan Azlan Shah Cup asayamong bronze aser silver, 2007 aser 2013 na nung Asia Cup gold aser silver agizükba osang jangjaogo.
2014 küm Asian Games gold medal agizüktsüsa Raghunath-i kanga junga asayaba osanga bushitetogo.
Dharamvir-a Asian Games gold medal agizüker telok nung densemba den külemi, 2014 Commonwealth Games nung silver aser 24 buba Sultan Azlan Shah Cup nung bronze medal agizüker asayar rong nung densema liasü.
Ritu lenisüba kübok India’er tetsür hockey teloki Brazil kübok Rio de Janeiro nung taküm August ita asayatsü ayongba Rio Olympics nung shilem agitsü jenjang angu.