Rome Open: Serena Williams 3 buba round-i iogo

Rome, May 11 (Agencies): America tsür, Serena Williams-i Germany tsür, Anna-Lena Friedsam madak takok ngua tang tasayadak Rome Open tennis asayamong tetsür singles 3 buba round asayatsü jenjang yashi, Mongolbar nü ajangzükogo.
Tetsür singles asayar tarensen nung 1 buba jenjang nung alila, Serena-i yashi points 6-4, 6-3 ngua 51 buba jenjang nung alila, Friedsam madak takok ngua liasü.
Shirangba ajanga taoba hopta asayaba Madrid Open asayamong nung Serena-i shilem magitetsüsa aküm saka tan asayamong nung lai meshirangdang ama shilem agitsü tenzüka lir.
Taoba mapang Grand Slam takok marok 21 tashi agizükla, Serena-i yaküm August ita Cincinnati Open takok marok agizükba sülenbo tanü tashi takok marok ka danga agizüka mali.
Yaküm asayaba Australian Open final nung Germany tsür, Angelique Kerber nem kokdaktsüba sülen Indian Wells asayamong final nunga Belarus tsür, Victoria Azarenka-i Serena madak takok ngua liasü.
Taküm 2016 küm shilem agiba asayamong, Miami Open  nunga Svetlana Kuznetsova-i Serena 4 buba round nung tsükdaktsü.
Ano külen, Canada tsür, Eugenie Bouchard-i points 6-4, 2-6, 6-3 agi Serbia tsür, Jelena Jankovic 1 buba round asaya nung tsükdaktsüba sülen Kerber den 2 buba round asayatsü lemzükogo.
2011 US Open champion, Australia tsür, Samantha Stosur-ia points 4-6, 7-6 (5), 6-1 agi America tsür, Alison Riske madak takok ngua liasü.
Tan asayamong nung 6 buba jenjang abensang, Japan nunger Kei Nishikori-ia points 5-7, 6-2, 6-3 agi Serbia nunger Viktor Troicki tebur singles 2 buba round nung tsükdaktsüba osang jangjaogo.
Czech Republic nunger Tomas Berdych-ia points 6-3, 6-4 ngua Spain nunger Albert Ramos-Vinolas tsükdaktsüba sülen 3 buba round-i iogo.
Switzerland nunger tennis asayar mongin, Roger Federer-ia minute 89 nung points 6-3, 7-5 ngua Germany nunger Alexander Zverev 2 buba round nung tsükdaktsüba sülen 3 buba round asayatsü jenjang tanü, Bodbar nü ajangzükogo.
Arishi küm 34 tain Federer-i tan asayamong nung 13 buba jenjang abener, Austria nunger Dominic Thiem den 3 buba round nung ajuruteptsü.