AKM, MTLT-i chiyungtsü liwar ayokba putet

Mokokchung, May 11: Mokokchung jila kübok dokan ka nung amtsük liwar tanurtem dang ayokba lazükba sülen Mokokchung Town Lanur Telongjem (MTLT) aser Ao Kaketshir Mungdang (AKM) longjemer iba dokan nungji kuli tejangja bushitsü atema ao, aser  atangji iba dokan nungji liwa chiyungtsü alibaji ngutet.
Arkong Ward, IM Road nung aliba Shyam Bhander dokan nung chips, amtsük aser tanga chiyungtsü teliwa aika aliba reprangteta police aser district administration nem osang agüja dokan nung aliba teliwa chiyungtsütem ajak agiteta ozüng kübok alen, ta MTLT President Imkümmeren aser AKM General Secretary Bendangkümba Aier nati metetdaktsü.
Aibelenba putetba sülen police-i dokan kibur parnok ket nung yua lir aser Mokokchung Municiple Council ajanga dokan permit meshizüka yuogo ta sangdong nungsa metetdaktsü.
AKM aser MTLT ajanga aibelener putetba ya tatempang sür medoktsütsü saka iba osang ajanga tanüngba shishilembaba telentem ajak tansütsü ka asütsüsa ozüngi alenang ta metetdaktsü.
AKM aser MTLT ajangasa nisung meimchir achitsü sen talangi alir saka mapang süir teliwa ayokba ya Indian Penal Code Section 273 aser Prevention of Food Adulteration Act 1954 anema aibelenba lir anungji shishilembartem ajaki temzüng anema mera agitsü aser nübur ashioktsütsü memerangtsüla ta metetdaktsü.