Turkey Tir, Erdogan-i Bangladesh aitsür

May 12, 2016 : Bangladesh-i Islamist yimtenren telok, Jamaat-e-Islami lenir, Motiur Rahman Nizami tepseta merenshiba atema aitsüba olen ka Turkey Ato Kilonser, Recep Tayyip Erdogan-i tanü, Brehostibar nü metetdaktsüogo.
Bangladesh aitsüba den külemi, Nizami tepseta merenshiba atema jashiba sayua, Erdogan-i par Bangladesh ambassador-a Bangladesh nungi jatetba osang angazükogo.
Tesüiba mapang, 1971 nung Pakistan nungi nüchiso ngua Bangladesh linük tasen ka tentettsü asoshi tongpang raradang tamangba yimsü, kin kidong aser yimtenren tangatettepbaren nung ajemdaker khen nung nisung jenti tepsetba ken o nung aitsüba sülen Bangladesh nung tentetba Islamist yimtenren telok tulutiba lenisang, arishi küm 73 tain Nizami yashi, Bodbar nü lisü agi alenseta merenshi.
“Aibelener nem tasüba temerenshi magütsütsü asoshi Europe ajungai taoba mapang metetdakja liasü. Ajisüaka, yashi Bangladesh nung tepseta merenshirji Muslim nisung ka asüba yong Europe ajungai pa tepseta merenshiba atema ola madok,” ta shia, Nizami tepseta merenshiba anema ola madokba atema Erdogan-i European Union (EU)-ia aitsüogo.