US & NATO nati Romania nung Missile Defense System tenzüktsür

Deveselu, May 12 (Agencies): US aser North Atlantic Treaty Organization (NATO) lenirtemi dollar sen million 800 jenjang aketba missile defense system ka Romania anülulentip tsütsülen tanü, Brehostibar nü tenzüktsüogo.
US o NATO-i tan missile defense system tenzüktsüba ajanga Russia jashidaktsüba osanga angazükogo.
“Russia anema raratsü nükjidong nung tan missile system ya tenzüker masü. Ano, tan tentettsüba missile defense system-ji Russia-i yangluba missile anema amshitetba tongpang oset masü ta US aser NATO napronglai metetdakja lir,” ta US Deputy Secretary of State, Frank Rose-i metetdaktsü.
“Russia-i par linük anemtsü nükjidong nung tan missile system-ji tenzüktsütsü renemer ta mepelaba olen ka metetdaktsüogo. Ajisüaka, par linük masü saka nungdak adokra, Iran anema amshitsü nükjidong nung tan missile system-ji tenzüktsür lir,” ta pai osang jangjashitsü.
“US o NATO nati Romania nung missile defense system tenzüktsütsü renemshibaji ozü Russia anemtsü nükjidong nung inyaker lir,” ta Russia’er Duma defense committee mendenbuba, Admiral Vladimir Komoyedov-i metetdakja liasü.
US nung ngutetba technology tasen amshia, arrürtemi kaloktsüba missile kadokja nübur aser linük kümzüktsü nükjidong nung NATO aser US nati aroki missile defense system ka Romania nung amenoktsü asoshi 2010 küm lemtetba sülen tan Devesulu nung tenzüktsüba missile defense system amenoktsü mapatong 2013 küm October ita nungi tenzüka inyak.