Angati rongsen bushirtem

Naga nungertem aser ano talisa Aortem timtem takoksa tia ajururtemji teimbaka angati rongsen bushirtem asütsü. Joko, alima nung ya tzü aser mopong dena alia agir, anungji itemji alitsü asoshi meranga inyaktsüba dak alaka angati sen aser angati rongsen bushia alitsübaji alima yimya agi memelar. Mapang kabo Nagaland nung nisung ajaki tiyazü subsidy bushia kibong mesütsü bilemba mapang liasü. Joko, kecha meinyaki sorkar nungi subsidy sen agizüka agibaba agi, sorkari sen magütsüra pei agitsü asoshi süngdonga kata metemnüi aküm. Aji oda, sorkari teyari sen magütsüra pei kima kilentzü dena maok odang yutsü. Iba sobalibaji tanü tashi meindoktetter. Aji oda, sen aika jenjang tiyazü sentong yanglur Kohima nungi Delhi tashi angati sen bushidang nisung aika telongi aluba osang angazüker. Tanüa asenok aika dak mapa meinyaki agitsü asoshi rongsen lenmang bushiba jakla keta lir. Ibayongji, tangar nem melemelaa ashiokdaktsür. Aji oda, tang Nagatsür asem ashiokdaktsüba Negiria nunger ka den India nunger ana Dimapur Police-i India len nungi pua bener aruba otsüji temenünütsüka, temeimtsüka aser tesempatsüka lir. Nisung shibar memetet aser mejangja ser internet ajanga shidi kisüng zülutepba agi puadaktsür angati rongsen agitsü penbuba Nagatsür temulungjangji tesempatsüka, tetsübutsüka aser tarendaktsüka lir. Iba jaklaji memelenshi nungbo ano tangar nem ashiokdaktsütsü ana nung lir. Nisung shibar memetet yur angati hon taribi agi yangluba sempet bener yoktsü atema sen meshi nung odang yokba shisatsü aser kolokji tabensabo masü. Aji oda, iba ama külakküpbonger nisungi angati rongsen aika agütsütsü asoshi pa den alitsü aja ka asünunga odang oa alitsü asü ta kanga arendaka bilemer. Atangji, Nagatsür aika item ama nisung denji odang oa aliba agi timtem lendong ajuruba otsü aika lir. Aji oda, Nagatsürbo angati sen ngura ojanga na ? Angati taginüba rongsen ngura takümji teperi-ana (?) ta asenok ajaki kanga aroka bilemdangtsüba mapang ka tongogo. Iba jakla ya memelenshi nungbo asenok kibong aika raksatsü aser kibong raksabaji asen lima raksar asütsü. Alima nung tia makatiba purtemji shirnoki mapa meinyaki rongsen bushir itemji asütsü, kechiyong ibajibo Tsüngrem ozüng anema lir, anungji azükaru masütsü. Mapa meinyaker ser akaba nisung pa mesüra la taküm piyong iba rongsenji mechimai jangratema aliba mangutsü. Aji oda, meinyaki anguba rongsenji kodanga semchir ket tashi tonga maotsü. Itemj semchirsemnur ket matongdang juli tapok nungi tsüka adoktsü. Asenokbo America nungba nungia, Africa nungba nungi mesüra India nungba nungia angati rongsen meshia agitsü memerangli. Alima nung ajak dang jangratemtsü mapa tajungtiba aser tematibaji peisasa inyaker chiyongba aser akaba taküm aser kibong lir. Aji oda, kari angati nü nem rongsen agütsütsü shira, naibo angati anguba rongsenbo magir ta shitettsüla.