ASLB osep atema

To,
The Chairman,
Ao Senden Literature Board
H.Q Mokokchung. Nagaland.

Nükmen : – ASLB OSEP ATEMA

Akümtsübua aliba Tulur,
Tamasa Yisu Khrista tenüng nung temeim salem abener. Aser Ao senden osep tasenba adoktsü ta angashia nia kanga pelaba shisemer.
Yangi kodaser Ao oshi mainer aser lanurtemi mesapur ta asüba tera ka telok den kü tangatetba ka lemsateper. Asenok tsüraburtemi Ao oshi yangludang mesüra English oshi nungi Ao agi meyipzükdang temelaleni masü tasakleni meyipzüka lir. Tatishitsü, “Jericho yimti nungi Yiroko yimtii lua liasü” ta sayutsünger kari jembibaji telok nung wawamenüteptsü tajung. Saka oshioben/literature atemabo aibelen tulutiba asütsü. English nung James Ao nung Yakob, English nung Egypt Ao nung Ijib, English nung Juda Ao nung Yihuda etc. Ano temenünütsüka ji “J” ajak “Y” agi Ao o nungji meyipzüker lir. Oshi angazükba nung proper noun mesüra tesem melenshiadokba ya yimsoshiba kechi komaka aruyonga tsükdaktsübasa. Ta ji nibo Laishiba literature Committee dang tetuyuba ka agütsür proper noun mesüra tesem ajak ya melenshir English osep nung aliba ama Ao laishiba nungjia liromedemdaktsüner. Iba jagi lanuri Laishiba azüngdang melamelaa angateta aotsü imlar aser tesapuba akümtsü tamang akar.
Nagaland nung kin 16 prongla indang olong Ao oshi nung dena lir (tanga kin den jayajako kasa aliba nungji, oshiji shiba tambuar meshiteter). Aser Hindi, Assamise, English, China densema Ao oshi nung lir. Tat. tajung ka ji European lima nung ocean cyclone tesashi mali, iba jagi Japan dang olong ji meshir TZÜNAMI ta oxford dictionary nung inokba asenok ajaki meteta lir. Asenok Aor dang masü, alima ajunga jayajako aser züngyazüngko tamendakdakji English oshi nung ji lir. Iba jagi Aor jayajako aser züngyazüngko aika liaka, nibo itatem tenüng aser hopta nung anogotem tenüng yabo English züngya nung ya dang memelenshii aginer. Asenoki kanga aginüra, olong jagi lanuasensortem atsür arutsüsa temelabaleni inoktsü merangtsüla.
Akok nungbo tang osep inoksemba kaket nung ya alphabet “I” aser “JI” amshim ya line ka danga tuyutet nungbo, iba jagia oshi nung tuluka yaritsü imlar. Olong kar tatem nung “h” inokba ya, ashiko olongji ter majung ka amai dang lir (tat. Sentsüh, aloh, apuh, akah, süh etc). item amshiyim nung “H” ya mamshii oren/olen jagi dang anidaktsü nung takoktsü lenmang lir. aser oshi nung tebenja lenmang kabo taneptsü angur amai akümtsü.
Tatemsa o (word) koba olong (meaning) den tesendaktep kecha mali mesüra teratet magütsüteter, item otem jibo asenokibo sapua mejembitsüla. Saka o tasen asüyonga koba agi olong küma rasateter, itemjibo ajungshiteptsüla. Ashiko lanuasensortemia o tasen inoknüdangji memeteti oshi ji talangka aintsü imlar.
Nenok nungi kaket tasenba aser tulubaji yakta adoktsü imlaa atadi. Kanga pelar.

Talitemjen Imchen
Dimapur.