CSS Mokokchung nungi matamabensartemi Impur semdang

Dimapur, July 29 (TYO) : July 26, 2015 nü Care and Support Society Mokokchung-i Impur Baptist Arogo semdanga tekülem sentep mapang matamabensar atema parnok lokti nung züngoka shilem agütsütsü tayongzükba sentong tajung ka agi.
Iba sentong nung Yangerienla Counsellor FCC menden liasü aser Menangchaba Coordinator, CBR ajanga tarur metepelatep.
Sentong nung Rashi Correspondent Secretary Mokokchung District Blind Association “who am I” ken ka ajanga shilem agi aser Katibenla member Disable People Organization, Khensa ajanga “my mother land” ken tena telok ayongzuk. Ano Lanupokyim Longsa-i takum kuli lemsatep, Burtula Coordinator PPTCT ajanga Care & Support Society indang lemsatep aser Tejennungsang Longmisa, (multiple disability)-i mouthorgan amshia “Kotak nung kimong ka” tena telok ayongzük.
Sentong nung C&SS, Managing Director Imchawati Kichu-i “Tsüngremi pa mesükba nung meimchir yanglur” onük nung ajemdaker Tsüngrem osang bena tesenteper ayongzük.
“Matamabensar ajak ya arogo aser yimten lokti nung temeten agüja parnok-a külem shilem agüja yaritepa aotsüla” ta Imchawati-i ayongzuk.
Sentong temer arogo tenzükertem den mensem ka mena Impur Arogo-ia matamabensai alirtem atema akok tashi nungita yaritepsü lemsatep aser Society nungia Arogo dang akok tashi matamabensar atema nendaka inyaktsü aser ABAM-i calendar nung matamabensar atema December ita Deobar ka inoka aliba nung sentong tajung agitsü ajungshitep.