Pebble-i India nung smartwatch kar sayaogo

New Delhi, May 13 (Agencies) : US nung amena aliba smartwatch yangluba company, Pebble Technology Corporation-i India nung technology meimertem atema sen 5,999 nungi tema smartwatch kar sayatsüogo.
Parnoki Pebble Classic sen 5,999, Pebble Time sen 9,999, Pebble Time Steel sen13,599 aser Pebble Time Round sen15,999 alangba smartwatch tem sayaogo aser item ya Amazon.in ajanga alitettsü.
“India nung Pebble takok angutsü ama onoki reprangteter. Onoki yangutetba sen khu temela oset balala ajanga tajangshiba tajung agütsütsü onok nükjidong lir,” ta Pebble Technology Corporation ngutetsang, CEO Eric Migicovsky-i sangdong ka ajanga metetdaktsü.
Item smartwatch ajak ya tzü maitsüsa yanglua lir.
Pebble Classic nung 1.26-inch ePaper display den 144×168-pixel resolution LCD keta lir aser khen full charge asübaji anogo tenet nü amshiteter. Iba anütetsü ya temerem, tanak, temesüng aser pink sentsütem nung angutsü.
Pebble Time smartwatch ya-a khen charge asübaji anogo tenet amshiteter aser temang anepaluyim nung yaritsü atema feature balaka inokja lir. Iba ya temerem, temesüng aser tanak sentsütem nung angutsü.
Pebble Time Steel indang battery yabo khen charge asübaji anogo 10 nü amshiteter aser talentsüji steel agi yanglu. Iba anütetsü nung ken angateter, tataloktsü aliba tem reprangteter, call agizüka jembiteter aser ano tanga mapa aika inyakteter.
Iba anütettsü ya tanak, silver aser hon sentsütem nung angutsü.
Pebble Time Round ya alima nung aliba smartwatch tem rongnung taputiba aser tepongbatiba koba gram 28 taret lir.
Pebble Time Round ya tanak, silver aser hon sentsütem nung angutsü.
Item smartwatch tem ya Apple aser Android ajanga amshiba osettem den külemi amshitettsü.