Theology azüngertem teinyaktsü

Tang mapangba ya alima shisatsü bushiba kaketrejutem den külemi Tsüngrem o bushiba kaketrejutema küm tema aruba mapang ka lir. Aji oda, ajak asoshi osang tajung kaji alima shisatsü bushirtem den toktepa Tsüngrem o bushir theology azüngertema aika Theological aser Bible college balala nungi graduate asür. Item  jagi alima tesem balala nung Tsüngrem temeim indang sayutsüngitsü aser parnok mapa agi kuli asütsü. Parnokji alima melenshitsürtem asütsü. Aji oda, küm shia Tsüngrem o nung graduate asüba kaketshir aika adoka angudang, parnok aotsüba aser inyaktsüba lima aser wadangtemji kong aser kechisa asütsü ta bilemdangtsüsa akümer. Atangji, theology azünger ta asüdang jet ta arogo aser mongdang nung inyaktsü amai bilemer. Ibajia shitak, kechiyong tanü asüng balaka theology mazüngerbo arogo aser mungdang nung meinyaktettsü. Aji oda, Tsüngrem mapa inyaktsü tenzükdak kimongjibo arogo dang asünungji, arogo shia nung tanüla temeshi agi sünga aliba laishirtemi anitsübaji kanga tenüngdaktsü kümogo. Ajisüaka, laishir ajakbo arogo nung inyaktsü yokba masü, anungji laishir ajakibo arogo nung meinyaktettsü aser tejangraa mejangratsüa akok. Aji oda, ita sen aika agütsüyonga laishir karibo arogo aser mungdang nung inyaktsüba dang nungibo tanga wadang nungang Tsüngremer mapa inyaktsü asoshi tejangraba asütsüa akok. Iba tangatetbaji ka yashi Discipleship Bible College pur convocation sentong nung tongti o jembir, Rev.Vezopa Tetseo-i Theology azüngba degree-ji mapa bushitsü asoshi anguba degree masü saka Yisu Khristai sayuba tesayubatem jungjunga angatetter Tsüngrem tenzüktsü asoshi azüngba degree ta züngshitsüla ta ashiba nung tagitsü lir ta angatetter. Atangji, tazüngba degree melii mapa angutsübaji tasak ajisüka theology azüngba yabo mapa bushitsü azünger masü saka Tsüngrem o aser Pa nükjidong tali tajungba angatettsü asoshi azünger ta angateta azüngtsübaji kanga tongtibang lir. Aji oda, tanü theology azünger ajakbo inyaknüyonga arogo aser mungdang nung meinyaktettsü mesüra alima tesem balala nung sayutsüngia mejajatettsüa akok. Anungji, iba ama tensa tia ka nung theology azüngertem ya kong kechi inyaktsü ta asübaji bilemdanga tangatetba kati arutsü kanga nüngdaker. Asenoki akhidang Tenyartem mapang tenyartem takümji reprangdangra, parnokji arogo nung ita sen chia inyakertem mesüra telok kari yaria Tsüngrem mapa inyaktsü yokbatem masü saka parnoksasa mapa tapu balala inyaka Tsüngrem mapa inyakertem liasü. Atangji, parnok mapang arogo tenteta mali asü aser parnokjia Laishir masü saka tanüla temeshi agi asüngba agi parnoki Tsüngrem o angatet aser kecha metsübui timtem arema sayutsüngia jajatsü mulungtet. Aji oda, akhidang tenyartemi Tsüngrem mapa inyakba tangatetba aser yimya nungji tanü laishirtemi alima tesem balala nung Tsüngrem mapa inyaktsüla. Asenoki jungjunga bilemdangra, arogo mesüra mungdang ka kübok talenba nung Tsüngrem mapa inyaktsübaji temelabo masü. Ajisüaka, arogo, mungdang aser alima ozüng agi kecha talenba melii peisasa pei anepaluteta Tsüngrem mapa inyaktsübajiang tesademba aser jangratemtsüka lir. Aji oda, sempet alirtem kar arogo aser mungdang lenitsü toktsürbo, tanüngba laishirtembo pei jangraba mapa inyaka aaba rongsen nungi Tsüngrem temeim kuli süa jajatsübaji jangratema bilema inyaktsüla ta ajungshiner. Kechi mapa inyakdir inyakaka, asen takümji Tsüngremer kuliser ka lir ta mamai inyaktsüla. Aji oda, arogo sen agia sayutsüngia jajaba dang nungibo, kokra, peisasa aaba sen amshia sayutsüngia jajaba tajungba ta asüba tangatteba nung alima shisatsü bushirtem dang nungibo laishirtemang temerangba meranga inyaka senotsü bendentsübaji tongtibang asütsü. Shiba südir süang, asenok taküm tatembang nungbo, shibai asenok yari, shirnoki asenok yok ta masü saka asenoki Kibuba asoshi kong kechi tajung inyaka ali ta asübajiang langzütsüsa adoktsü.