Nagaland nung Child Protection coordination committee alitsü

Kohima, May 13 (TYO): Tanü Child Protection atema state level consultation senden ka amendang Coordination Committee ka tentettsü lemtetogo.
‘Asen chirnurtem kümzüka alitsü aser tanurtem indang Nagaland kümdaktsütsü’ atema lokti balala, Arogotem aser yimtsüng tentet den sorkar department balala nungi züngsemba ludeni mapa inyaktsü.
Tanü Police Headquarters Conference Hall, Kohima nung State Child Commission for Protection of Child Rights (SCPCR) den CHILDLINE Kohima & Dimapur-i yarisema ayongzükba senden nung, SCPCR convener ser state nung tanurtem kümzüka alitsü atema sorkar department balala, lokti tentettem aser nüburtem nem tanurtem indang temeten balala metetdaktsütsü atema sentong yanglua inyaktsü.
Senden nungsa, committee nungji State Child Protection Society (SCPS), Legal Services, Police, Labour Department, Education Department, All Nagaland Private School Association (ANPSA), CHILDLINE, Arogotem, Kaketshir tentet aser Village Child Protection Committee nungi züngsemtem alitsü, telemtetba agi.
Parnokisa state sorkar dang state sasep nung Child Protection Policy aser Rules yanglutsü mepishiogo.
Iba senden nung jembidang Kohima DC, Rovilatuo Mor-i, tanurtemji linük atema tarutsü teimla, ta metetdaktsü.
Paisa, “Tai maket aser metaloker alir tanurtem dak taintemi tim mesüi benshir, koba ajanga tanurtem tejangraba aser mangdang tepseter,” ta ashi.
Iba dak sentakba nung DC-i, sorkar, lokti tentet aser bangdakpurtemi tanurtem anepalua kümzüka ayutsüla, aser parnok temetentem aser maongkatemji agütsütsü atema inyaktsüla, ta ashi.
Kasa senden nung SCPRC züngsem, Diethono Nakhro, CHILDLINE Dimapur Director, K Ela nungeria jembia liasü.
Christian Revival Church aser Nagaland Baptist Church Council-ia iba maparen nungita yaritsü ta shiogo.
Ano “Child friendly legal services for protection of children” onük nung Nagaland State Legal Service Authority member secretary, Nino Iralu-i jembi aser ‘State Child protection mechanism’ onük nung SCPS Director, Z. Nyusietho Nyuthe-i jembia liasü.