Bihar nung journalist ka teseptba ken o nung nisung 4 pua lir

Patna, May 14 (Agencies): Bihar, Siwan district nung Hindi osangkaket, Hindustan nung senior journalist ka tepsetba ken o nung temelung melemi nisung pezü pua lir, ta Honibarnü police-i ashi.
HT Media den sentaktepa aliba Hindi osangkaket nung Siwan bureau tongti, Rajdeo Ranjan Hokolbar aonung Station Radio anasa shishilembaba tesem ka nung kahset, ta district police ketdangser kati ashi.
“Iba ken o nung asüngdangyatsü atema nisung pezü pua lir. Nisung tepsetertem aputsü atema mita aoba maparen tenzükogo,” ta ketdangserisa ashi.
Hokolbar aonung tesü Bihar Police headquarters-i Special Task Force (STF) ka aser  Special Operations Group ka Siwan-i yoka liasü.
“Nisung tepsetertemji onoki aputsü aser shinga danga tai matoktsü,” ta Bihar Police tongti, P.K. Thakur-i ashi.
Rajdeo’er kinüngertemi ashiba agi, pa shinga den-a tsükchitepa maliasü aser pa kibong kümer küm 17 ajungba benjungmung amungtsü atema tesüiba anogo ishika kanga mazüngi renema liasü.
Tawa Gaya district nung asangur chuna ka tenüng agi, Aditya Sachdeva tepsetba sülen mapang tatsüka tsüngda journalist, Rajdeo tepsetba tatalokba nung ajemdaker state nung opposition party, BJP-i, “Iba ya Bihar nung ozüng maliba yimsüsüba mapang meyipa arur,” ta aitsüogo.
Bihar Chief Minister, Nitish Kumar-i item tatalokba aitsüogo aser police tongti ketdangsertem dang aibelenertemji tekaraba nung aputsü atema tuyuogo.