Nuclear Suppliers Group atema India renema lir: US

Washington, May 14 (Agencies): India linük Nuclear Suppliers Group (NSG) nung züngsemtsü atema benokba anema China aser Pakistan linük nati senteper nokdakba mapang ka nung Hokolbarnü US-i, missile technology control regime ajanga nüngdakbatem atema India temsüa lir aser NSG nung adentsü atema renema lir, ta metetdaktsü.
Osangbenertem senden nung State Department otongdar, John Kirby-i, “Ni iba ya lepshia ashir- 2015 küm Tiri India semdangba mapang pai missile technology control ajanga nüngdakbatem atema India temsüa lir aser NSG züngsem atema renema lir ta US-i bilemer ta jembia liasü,” ta metetdaktsü.
Nuclear Suppliers Group (NSG) nung India linük züngsemtsü benokba anema China aser Pakistan nati longjemer nokdaker ta osang angazükba dak sentakba tasüngdangba ka langzüdang pai item o jembia liasü.
“India züngsemtsü onük dak sentakba nung China aser Pakistan sorkartem jenjang ni tetshitsü,” ta Kirby-i ashi.
“Tasen züngsemtem Nuclear Suppliers Group nung adentsüji tang aliba züngsemtem telung onük lir,” ta pai ashi.
India NSG nung züngsemtsü benokba anema tanü China-i ashiba agi, 48-nation bloc nung linük aikati NSG ulushitsü atema NPT tezüngzüktepji tongtibang ta shiogo.
UN züngsem rongnung NPT tezüngzüktep agia maliba linük pezüji India, Pakistan, Israel aser South Sudan linüktem lir.