Kechiba Yisu tanaben marur ?

Yisu Khrista ni asoshi asü aser shia arur kotaki atu aser ano Pa tanaben alimai arutsü ta amangba dang tamanger ta ajar. Iba tamangba jagi Khristan akümer. Aji oda, alima nung kechi atalokdir atalokang temeshipur pei tamang agi alitsü ta asüba tashiji iba tamangba nung jagi angur. Iba tamang nungji teimla dena lir aser iba teimla jagi tamang tashi itdaktsür. Atangji, asenoki Pa tanaben arutsü ta amangaka Pa talangka maruba agi teimla samadoktsüa akok. Idangji, Laishiba nung shia aliba ama tamalen pur tesülen pur akümer aser tesülen pur tamalen pur akümer. Aji oda, Yisu alimai marudangyongi Yihuda nungertemibo parnok bendanger yimli talenba kübok nungi salatsütsü asoshi kümtetdakba ka arutsü ta amanga aru, saka parnoki Yisu dakbo mamang, kechiyong Yisui parnok nem alima yimten nüjisobo magütsü. Ibayongji, Yihuda nunger asoshibo ano kümtetdakba Messiah-ji maru saka asenok asoshibo Messiah-ji tanaben arutsü atar. Atangji, Yihuda nungertemia tang tashi Messiah-ji arutsübasa ta imlaa atar aser asenokia arutsübasa ta imlar. Iba teimla jagi dang asenok Yisu Khrista dak amangba tamang jenjang masetshidaktsür. Ajisüaka, asenok tamangertem aika asoshi Yisu Khrista tanaben arutsübaji tiyazü shinba amai bilemer, kechiyong küm meyirijang ana dak tali süiaka marur. Ajisüaka, Laishiba nung 2 Peter 3:8-13 nung ashir, ” …. Temeimbatem, Kibuba tsüngdang anogo kaji küm meyi ka ama aser küm meyi kaji anogo ka ama lir, Iba o ya asenoki mezüngmeshi tesüma. Kari menur ama bilemaka, Kibubai pei tenangzükba indang memenur, saka shinga mesamadaktsüner, anungji nisung ajak temulung meyipdaktsünüa talangka aremzüka atar. Ajisüaka, auer ka ama Kibuba anogo arutsü. Iba anogo nung anüngtem ola tulu adoka aenshia aotsü aser anüng nung alibatem mi agi yimsaa aotsü aser alima aser idakji aliba ajak rongdoktsü. Iba amaji alima yabo yimsaa aotsüba lima ka lir ta meteta, nenok kechi ama nisung (tamanger) ka asütsü ? Nenok temeshiba aser Tsüngrem mesükba nung lia, Kiuba anogo asoshiji yongyaa liang. Kibuba aruba anogo nungji anüngtem mi tatsük agi rongsatsü aser yangji alibatem yimsaa aotsü. Aser Pai nangzükba amato anüngtem tasen aser alima tasen kechi nung temeshipurtem alir, aji asoshi asenok ataa alir.” Iba Laishiba tekongtem nung Peteri asenok dang tang tashi kechiba Yisu Khrista tanaben marur (?) ibaji angatetdaktsüner. Ibaji angatet nung dang asenoki Pa maru tashi aremzüka litettsü ta asüba tangatetba nung Peteri iba shidi ya asenok ama tamangertem dangi zülu. Atangji, Kibuba anogo asoshi meshiteta ataa alirtem asoshibo yakta aruang tajungba ta bilemer, ajisüaka mekümzükba purtem asoshibo Pa arubaji ayatai asütsü. Ibayongji, nisung ajak temulung meyipdaktsünüa Tsüngremi aochia atar. Iba nükjidong nung Yisu Khrista tekümtet osang tajungji alima ajunga nung kin ajak dang kuli asütsü asoshi sayutsüngitsü aser idangji tatem arutsü ta Mathi 24:14 nung shia aliba angutsü. Aji oda, Tsüngremi asenok shinga mesamadaktsünüba agi atapisar ta tenyar Peteri asenok nem angatetdaktsüner. Iba o nungji amanga asenoki Kibuba Yisu Khrista arutsü imlaseta Pa dak amangra asenok kodanga tezümatangtsü. Aji oda, asenok asoshi tang tashi kechiba Yisu Khrista tanaben marur ta rataa alitsüba mapang masü saka tatem anogo nung anüng aser alima ajak mi tatsük agi rongdoktsü alinung, iba mapangji asenok kong jenoktsü ta asübajiang amangba purtem asosh tongtibang lir. Laishibai anüng aser alima tasen indang jembir aser ibaji tang asenok aliba lima aser asenoki anguba anüng ya samadoker temeshipurtem alitsüba lima lir. Kodang mi agi asenok aliba lima ya rongdokdir, asenoka alima tasen nungji jenoktsü. Mathi aser Peter tapu nung shia aliba osangtem ya asenok kümzüktsü asoshi kümdangshidaktsüba osang tajung ka lir. Iba temeim osangtajung nungji asenoki amanga teimla tulu nung asen Kibuba Yisu Khrista tanaben aru ataa Pai tenyaba mapatem inyaka alitsübaji jangratemtsüka asütsü.