UPA sorkari senpong tazüng toktsü: Amit

New Delhi, May 15 (Agencies): Gujarat, Dahod district nung tanü BJP Tir,  Amit Shah-i, taoba mapang küm 10 yimsüsüba sorkar, UPA-i senpong tazüng toktsüba ajanga tang aliba NDA sorkari sensakertem atema inyaktsü maparen nung tetsükdaktsü ajurur, ta metetdaktsü.
“UPA sorkari onok nem senpong tazüng toktsü, iba yongji tang aliba sorkari sensakertem atema kecha meinyaktsüteter,” ta BJP tongti, Amit Shah-i ashi.
Tanü iba senden nung Gujarat, Madhya Pradesh aser Rajasthan chief minister tema densema liasü.
“Ato kilonseri (Modi) menden agizükba mapang nungi ochimashi anentsü atema inyakba den black market nokdangtsü atema sensakertem bank account nung sen crore 13,000 indangindanga inoktsü,” ta pai ashi.
‘Pradhan Mantri Ujjwala Yojana’ mapatong dak sentakba nung Shah-i, “Tetsürtem tashi aittsü atema ‘Ujjwala Yojana’ dak alaka scheme tajungba mali,” ta ashi.
“Tetsür crore trok atema gas connection agitsütsü, aser iba ya tetsürtem tashi itdaktsüba aser sensak tia ajema kümdaktsüba tatishitsü tajung ka lir,” ta paisa ashi.
Ato kilonser, Narendra Modi-i iba programme ya May 1 nü Uttar Pradesh, Ballia nung tenzükja liasü. Iba scheme ajanga nisung crore 5 tajangzük angutsü atema sorkari sen crore 8,000 lemzüktsüogo.
Tanü ‘Pradhan Mantri Ujjwala Yojana’ tanabubaren sentong nung Petroleum & Natural Gas Dharmendra Pradhan Union minister den state asem nungi chief minister tem- Anandiben Patel (Gujarat), Vasundhara Raje (Rajasthan) aser Shivraj Singh Chouhan (Madhya Pradesh) nungera liasü.
Kasa sentong nung Rajasthan Chief Minister, Vasundhara Raje-i, sensakertem atema inyaktsütsüji Modi tangatetba lir, ta ashi.
Laisa, “Congress Party aser BJP na tsüngda tepila tulutibaji, BJP-i jembiba dang masü saka mapa agia inyaker, ajisüaka Congress-ibo tenangzük dang nangzüker aser ibaji kodanga mataloktsür,” ta aitsü.
Gujarat Chief Minister, Anandiben Patel-ia, Lok Sabha election magidang nangzükbatem Modi-i inyakogo, ta ashi.