Nagaland nung HIV/AIDS azüoktsüla

Deobarnü alima ajunga nung HIV/AIDS atema inyakba teloktem 33 buba International AIDS Candlelight Memorial sentongtem ayongzüka mungogo. Nagaland nunga tesem balala nung iba sentong ayongzüka agiogo aser asen state yimtiba nung sentong ka agidang o jembirtemi HIV/AIDS noktangba, azüokba aser anepaluba maparen nung nübortemi shilem agitsü tayongzükba agütsüogo. Alima nung HIV awareness indang sentong tulutibaji International AIDS Candlelight Memorial ya lir aser iba ya Global Network of People living with HIV ajanga acha-ayanger. 1983 küm International AIDS Candlelight Memorial amungtsü tenzük aser kümshia May ita Deobar tasembuba nung iba anogo amunger aser linük 115 shi ka nung telok 1,200 den temai iba sentong ayongzüka amunger. Deobarnü Kohima nung ayongzüka amungba sentong nung o jembir kati, alima nungi HIV/AIDS wara agientsü atema nübortem külemi longjemtsü ayongzük aser ano o jembirisa tanü lanuputu dang HIV anepaluba, noktangba aser anepaluba indang tesayubatem agütsütsü shiogo. India nung National AIDS Control Organisation-i bushitetba osang nung ashiba agi, linük nung general public rongnung HIV positive cases 0.88% liasü aser iba telemsa nung Nagaland nung HIV positive cases timba lir. “Tamalenbo ozüng alema mozümora achirtem aser yi ajemertem dak dang AIDS kanga bulua liasü saka tangbo Nagaland nung general public dak kanga bulua menateper aser iba asoshi kanga sasa bilemer,” ta Network of Nagaland Drugs & AIDS Organization President, Abou Mere-i Deobarnü metetdaktsüogo. Atangji iba ya asenok Naga nunger asoshi tebilemtsü khuret tulu ka lir aser asenoki asen loktiliba nung iba wara atema tanü langka kar inyaktsüla. Asenoki mapang shitak nung teinyaktsütem meinyakra, tarutsü asen lima tiaji kanga tamajung asütsü. Tesüiba mapang asenoki HIV/AIDS tashidak ya mozü achirtemi dang menazüker aser parnok tsüngda dang menateper ta jembia aru saka ibaji asenoki metongi bilemba ka liasü. Kechiyong iba tashidak ya azü, kotzü aser ano temang nungi aluba tzü kar ajanga menateper aser iba nungi nisung shinga jenbua mali. Tanur karbo HIV aketba tetsü dak nungi tepok nung iba tashidak keter asor aser kar pei apuani (HIV aketer) nungi memeteti menazüker. Iba tashidak ya kanga dang tetsübutsüka kechiyong tashidak yimjak nung adoka meteter küm aika süia arur, saka tanü tashi iba tashidak den raratsü mesüra aneptsü atema mozü ka dang bushiteta mali. Asen Naga lima nung general public rongnung HIV/AIDS tashidak kanga adokba osangji angashia asenok kanga shisabulutsüla. Iba tashidak noktangtsü, azüoktsü aser meteta lidaktsütsü atema state Sorkar, Arogotem aser Mulungtet teloktemi pei pei jenjang nung takokba tashi mapa inyaktsüla, aji ta mesüra Naga nunger tarutsü putuji kanga dang tesasatsüka asütsü. Asen loktiliba nung HIV/AIDS agi aketertem mesüra shirangertem mesenmetua amshiba yimya aser parnok senzüka toktsüba tangatetba ya agientsüla, aji asü nungdang asenoki HIV/AIDS anema rara nung takok angutsü. Mezüngbuba nung tanü asen lima nung HIV/AIDS aketertem mesüra shirangertem dang asenoki temeim sayua anepalutsüla, teyari agütsütsüla aser parnok dak nungi tashidak menatepa maotsü atema noktangtsüla. Tanabuba nung, asenoki asen loktiliba nung HIV/AIDS indang temetettsütem sangdongtsüla aser iba nungi jenbua alitsü atema tesayubatem agütsütsüla. Sorkari HIV/AIDS atema inyakba teloktem teyaritsü tim agüja yaritepba den sorkar jenjang nung mapatem inyaktsüla, külen Arogotemia pei sabang nung iba tashidak indang osang proktsüla aser amangbapurtem iba tashidak nungi jenbua alitsü atema tesayubatem agütsütsüla. Khristan tem timba sür aliba state ka asünung, iba onük atema dang masü saka loktiliba dak sendakba onük aika atema arogotemi tongti shilem agitsüsa akümer. Pei arogopurtem dang Lai o nungi asüngteta alitsü, shi-azü jangraba nungi pilaa alitsü aser talisa lanuputu nem item tesayuba agütsütsüji arogo indang mapa lir. Anungji, Nagaland nung arogotemi HIV/AIDS ji temenen ka ta züngshia senzüka yutsüba tangatetba melenshitsüla saka pei züngsemtem dang iba tashidak indang temetettsütem metetdaktsüba den iba tashidak keta alirtem aser shirangertem atema aria bilemja yariba den parnok nem tanela chiyungtsü agüja parnok tekümtet lenmang nung anitsü merangtsüla. Ano, Mulungtet teloktemia pei pei sabang nungi iba tashidak atema sentongtem ayonga akatsüla aser sorkar o arogoi inyakba mapatem nungita yariteptsüla. Asen loktiliba nung HIV/AIDS kanga bulua menateper ta bushiteter süra, asenok joko ojang dang yimpazüa lidi, saka saksalemer iba khuret tuluba mekümdaktsüi azüoktsü merangdi.