Onoki Africa nunger dang nisung shi mayok:China

Lusaka, May 18 (Agencies) : Beijing nung Africa nunger dang nisung shi tachitsü atema ayoker ta Zambia nunger osangbenertemi ashiba, China nunger ketdangser kati aitsüogo.

China nung alir Zambia tsür kati nüburtem dang ‘Chinese corned beef’ malitsü metetdaktsüba osang ka, Xinhua news agency osang ajanga ashi.

China nung aliba nashi aser jang shi ayokertemi nisung tasümang sarutener ‘marinate’ süa ayur.Iba shi nungji parnoki ‘corned beef’ ta zülur Africa linüktem dang ayoker, ta iba tetsür jagi ashi.

China nungi Zambia ambassador, Yang Youming-i, Zambia aser China na mapang talangka nungi kanga putepa aliba tiyazü osang kar ajanga raksatsütsü meranger, ta ashi.

“Koda sür onoki iba amala mapa inyaktsü ama bilemer. Ya onok maksütsü atema prokba olulu lir,” ta pai ashi.

“Iba tatalokba nung onoki kanga jangshiba metetdaktsür aser iba ama osang tamajung prokba yimya onoki aitsür,” ta pai shisem.

Zambia sorkar dang iba osang tejangja bushisüngdangtsü temepishiba ka agütsüogo.