Tir Mukherjee-i anogo pezünü China semdangtsü

Beijing, May 18 (Agencies): India Tir Pranab Mukherjee-i May 24, 2016 nü nungi tenzüka China linük anogo pezünü semdangtsü. Tan pai semdangba ya India nung tekolak kati küm trok buba nung China mezüngbuba semdanger asütsü.

May 24 nungi 27 tashi China semdangtsü sentong yangluba ya China Tir, Xi Jinping-i jaokba lir, ta Bodhbarnü China foreign ministry nung otongdar Lu Kang-i ashi.

2010 küm India Tir Pratibha Patil-i China khen semdanga lir.

May 24 nü Mukherjee-i Pearl ayongküm nung industry aika aliba Guangzhou yimti  semdangtsü. Iba yimti ya China anülulentip tsütsü Guangdong province nung lir.

Iba yimti indang ali shilem ana China meyong lir aser Gross Domestic Product (GDP) shilem 12 lemsateper. Mukherjee-i yangji aliba India nungertem den sensaksem sentong ka akatsü.

Guangdong province foreign affairs nung director Chen Jiasheng-ibo iba sentong atema kecha telangzüba magutsü.

“Ni India Tir ajuruba sülenang ni bilemba kar ashitsü,” ta Chen-i IANS dang telephone ajanga ashi.

Tir Mukherjee ya May 25, 2016 nü Beijing-i aotsü aser yangji pa telok ka den senden amentsü.

Tir Xi aser Ato Kilonser Li Keqiang na ajuruba sülen Mukherjee-i Peking University semdanga kaketshirtem den sensak asemtsü.

Pa May 27, 2016 anepdang linüki apusoa arutsü.

Taoba ita Defence Minister Manohar Parikar aser National Security Adviser Ajit Doval nati Beijing nung oa defence lenirtem den ajurutepba sülen tan linük Tir-i semdangtsü sentong yangurba lir.