Godhra ken o nung küm 14 sülen tongti aibelensang puogo

New Delhi, May 18 (Agencies): 2002 küm nisung 59 tepsetba Godhra ken o nung küm 14 tashi jenshia senzüba sülen tanü Gujarat ATS-i iba ken o nung tongti tai tonglokja alisang puogo.

Train nung rara adokba sülen state tesem ajaklen rara tulu adoka nisung jenti tepseta liasü.

Bodhbarnü ATS ketdangser kati, 2002 küm February 27 nü Godhra Railway Station nung train rongtoktsütsü atema sentong yanglur, Farooq Mohammad Bhana ya tongti tai tonglokja alir rongnung ka lir, ta ashi.

Anti-Terrorism Squad (ATS) ketdangsertemi ashiba agi, iba lendong atalokba mapang Bhana ya Godhra nung corporator liasü. Police nem mepudaktsütsü atema pa Mumbai-i ao aser property broker ka akum.

“Osang ka lazükba sülen tanü Bhana Mumbai nungi Godhra-i aoba mapang onoki pa Panchamal district anasa aliba Kalol jila nung aliba toll plaza ka nung puogo. Godhra lendong atema sentong asameyanger tongti rongnung pa densema lir,” ta ATS ketdangser kati metetdaktsü.

Train, S-6 coach nung mi senoktsütsü atema sentong yangluba nung ajemdaker Bhana densema tangartem anema FIR ka benok.

Maulana Umerji-i tuyuba nung ajemdaker Bhana den corporator ka tenüng agi Bilal Haji nati tangartem dang train coach nung mi senoktsütsü tuyu, ta tai tonglokja lir.

Iba tatalokba ken o nung Maulana Umerji bo pua liasü saka tesülen chiok.

Sabarmati Express train, S-6 coach nung mi senoktsüba lendong nung nisung 59 tashi asü, iba tatalokba sülen state nung rara tulu adoka nisung 1,000 dak tema tepseta liasü.