Delhi sorkari state ketdang mesütettsü: Sheila Dikshit

New Delhi, May 18 (Agencies): Bodhbarnü taoba Delhi Chief Minister aser Congress lenir, Sheila Dikshit-i AAP tongti lenir aser Delhi Chief Minister, Arvind Kejriwal leniba nung Delhi state jenjang atema Aam Aadmi Party-i yangluba draft bill aija jembiogo.

Bodhbarnü New Delhi nung osangbenertem den jembidang Sheila Dikshit-i, “Parnoki (AAP) draft bill nungji kechisa shia lir’ar (ni) mejangja. Onoki police shilem karbo Delhi sorkar nem agüjang ta mepishi. Talisa onoki DDA nung Delhi sorkar atema benok. Ajisüaka  tang tensa reprangdangra, India sorkari Delhi nem state jenjang magütsütsü ama reprangteter,” ta ashi.

Congress lenir aser asembenren tashi Delhi chief minister inyakla, Sheila-isa, “Delhi sorkari MCD kijaa ketdang mesüteter, süra state jenjang ka angu nunga parnoki kechi koda ketdang sütettsü,” ta ashi. Tanep osangbenerem senden ka nung Delhi Chief Minister, Kejriwal-i, Aam Aadmi Party (AAP) sorkari linük yimtiba nem state jenjang agütsütsü atema draft bill ka renemogo, ta sangdonga liasü.

Kejriwal-isa, “Onoki draft bill ji onok meyong website nung inoktsüogo,” ta ashi

Delhi chief minister-isa Delhi nüburtem dang draft bill dak sentakba nung tebilemba lemsatepnüra June 30, 2016 tashi nung lemsatepdaktsüner, ta mepishiogo.