Yoga Day anema ola adoktsüla

University Grants Commission-i India kübok university aser college tem dang June 21 nü Yoga Day amungdang ‘Om’ shia külemtsü aser Sanskrit ‘sholaka’ tekongtem azüngtsü indang tetuyuba agütsüba anema Mongulbar nungi linük nung yimten teloktem tsüngda ashishitep ken o adoka lir. Yoga ya akhidang nungi India nung benshia aruba yimya ka lir anungji BJP-i parnok aginüba ama Yoga mamshitsüla aser nübortem dak ozüng ka ama Yoga aitsü tetuyuba magütsütsüla ta Congress-i aitsüogo aser külen Janata Dal (United)-ia BJP-i India nunger rongnung telemsa tali adokdaktsütsü atema Yoga tesayuba agütsür ta aitsüogo. JD(U) lennir tejen KC Tyagi-i “Kodaser nenoki Muslim, Sikh, Christian nunger dang ‘Om’ shia külemang ta shitettsü. Kü atemabo ibaji kecha masü kechiyong ni Hindu nunger ka lir saka tanga tamangba yimsü amangertem dang kodaser ‘Om’ ta ken tena külemtsü tuyur. Iba ya RSS-i telemsa adokdaktsütsü atema inyakba mapa ka lir aser onoki aitsür” ta metetdaktsüogo. Taoba hopta UGC secretary Jaspal S Sandhu-i linük nung University balala nung Vice Chancellor tem dang International Day of Yoga amungtsü atema sentong renemtsü aser iba nung University aser college tem nungi kaketshirtem aser tesayurtem ajak dendakjang ta tetuyuba agütsü. UGC secretary-i shisaliok rejutem dangi züluba shidi den külemi Ayush Ministry-i Yoga aitsü atema minute 45 telatetba ka dena agütsü. Ayush Ministry-i Yoga aitsü atema agütsüba telatetba nung minute ana ‘Om’ ta tekülem ken atentsü aser Sanskrit Shlokas kar azüngtsü shia lir. Iba sülen minute 18 yoga aitsü aser pranayam asütsü aser minute 9 tashi ola madoki külemba sülen ‘Shanti Paath’ zünger tembangtsü shia lir. Ayush Ministry ketdangser ka aser BJP national secretary nati nisung ajaki ‘Om’ tekülem ken atentsü tetuyuba magütsü ta shiogo. Ajisüaka, RJD aser CPI(M) yimten teloktemia iba onük atema Modi’er sorkar aitsüogo aser parnoki telemsa adokdaktsütsü meranger ta tai tongloktsü. Internet nung aliba Wikipedia ajanga Yoga indang teratet shia aliba nung, Yoga ya Sanskrit oshi nungi lir India nung mezüng tenzük ta agüja lir. Yoga ya temang, tekolok, aser tanelaren dak sendakba inyakyim ka lir. Rigveda nung shia aliba nung Yoga ji India nung putu trokbuba aser punguba nung mezüng adok. Rigveda ya India nunger akhi Vedic Sanskrit kenten bendenba lir aser iba ya Hindu tamangba yimsü nung kaket pezü rongnung ka lir. India nung Yoga guru temi putu 19 buba tatemlen aser putu 20 buba tetenzüklen anüolen alirtem dang Yoga sayu aser 1980s mapang anüolen alirtem asoshi Yoga ya temang asoshi exercise yimya nüngtugu ka aküm. India nunger sobaliba nung Yoga ya temang asoshi exercise ka dang masü saka tekülem aser tanela asoshi kanga tongtipang ta züngshir. Hinduism indang tesayuba agütsüba school tongtiba trok dang Yoga ta ajar aser item school ya Hindu Samkhya tangatetba den sendaktepa lir. Süra, tang India linük nung Yoga atema o atsütepbaji tim dang aser yimten telok kari Yoga anembaji parnoki kuli tejangja nung ammeter anemer ta asenoki angateter. Yaküm India Prime Minister, Narendra Modi-i Canada linük semdangdang, Hinduism ji tamangba yimsü ka masü saka taküm libaliroa aoba yimya ka dang lir ta ashi. Taküm libaliro yimya ka dang süra, kechiba Hindu nungertemi süngyanglu tsüngremtem külemer aser tekülem kitem yanglur? Iba olenji pai kechi tangatetba nung jembiar memetet saka pa langka ka nungi jenbutsü merangdang jembi asütsü südi ta angajemer. Tang India nung BJP-i aniba NDA sorkar nung tanga yimten teloktem dena lir saka parnok timbaka Hindu yimsü dak amendaka aliba teloktem lir aser iba jagi parnoki India nung Hindu nunger tesayuba angazükdaktsütsü meranger asütsü akok. Ajisüaka, tanüngba yimten teloktem aser tamangba yimsü ajak kasa ta züngshiba teloktemi sorkar sentongtem anema noktaktsüla aser parnok alizüng metongdaktsütsü merangtsüla. Iba denji külemi Hindu amanger dak alia tanüngba tamangba yimsü teloktemia yimten teloktem pusema ola adoktsüla. Khristantem timba ser aliba Nagaland state nunga yaküm International Day of Yoga ayongzüka mungogo aser taküma amungtsü sentong renemya alitsü südi. India kübok state ka asünung Centre nungi tetuyuba agütsüba sülen state sorkar anidaktsüsa akümer. Ajisüaka, state sorkari kanga dang kümdanga aser shisadanga iba sentong ayongzüka amungtsüla. Nagaland nung NBCC-i anir kin balala nung arogo tentettem lir anungji arogotemi Centre-i angashitsüsa Yoga anema ola adoktsüla. Tan serbo International Day of Yoga ji temulunger state temi dang ayongzüka amungtsü ta Centre-i telemtetba ka agitsüsa Nagaland nung aliba Khristantemi ola adoktsüla.