Nübur tamang kokettsü atema meranga inyaktsü: Rahul

New Delhi, May 19 (Agencies): State pongu nung assembly election agiba osang  sangdongba anogo nung Congress-i yimsüsüba state, Assam aser Kerala na nung party-i tamakok angutsü ta meteta tanü Congress tatong Tir, Rahul Gandhi-i twitter ajanga, party-i nüburtem tamang mekoktet tashi meranga inyaktsü, ta ashi.
“Nüburtemi shimbaji onoki ajemalua agizüker. Election nung takok angur party tem nem ni tenüngsang agütsür,” ta Rahul Gandhi-i ashi.
“Item election nung Congress nung inyakertem den lenirtem aser teloktep party tem dang pelaba ni shisemer. Onoki nübur tamang mekoktet tashi meranga inyaktsü,” ta pai ashi.
Congress-i yimsüsüba state- Kerala aser Assam na nung tamakok angutsü aser West Bengal o Tamil Nadu na nunga tangar den lokteper toktepaka tamakok angutsü ta meteta Rahul-i item o jembi.
Ano külen Congress otongdar, Manish Tewari-ia mepelaba olen jembi saka, ibaji meimlai aliba ka masü, ta ashi.
Congress-i taoba küm 15 tashi yimsüsüba state, Assam nung party-i tamakok anguba dak sentakba nung Tiwari-i, “Osangji tejashitsüka lir, ajisüaka ibaji meimlai aliba ka masü. Küm 15 sülen Assam-i (nüburtemi) temelenshi ka bushi südi,” ta ashi.