Nagaland Police nung interview magii shimertem anendaktsütsüla : NPYC

Kohima, July 29 (TYO) : Bodbarnü Nagaland Pradesh Youth Congress (NPYC)-i Angh P B Acharya nem tezüluba ka nung State Police department nung 2013 nungi tanü tashi interview magii nübo talila aniokba indang osang metetdaktsüogo.
Nagaland nung azüngtsü-zülutsü meteter noklang nung shilem 82 lir aser unemployment register nung lanur 70,000 den tema tenüng züluoka lir aser ano tenüng mezüluokertemia kasaji lir. Ajisüaka, NPF-i aniba DAN sorkari grade III aser IV mapa asoshi advertisement, written aser oral interview agibatem sendokogo, ta NPYC tezüluba nung shia lir.
“State Cabinet-i gazette posts atema Nagaland Public Service Commission majangi miima shimoker” ta NPYC-isa metetdaktsüogo.
2003 küm Nagaland nung NPF-i aniba DAN sorkar tashi aruba sülen nungi inyakyim ajak nung tejak repranga aser tim mesüi inyaktsü tenzük. Iba ya tatartemi tenangzükba agiba aser Linük Temzüng den meputep lir. Iba inyakyim ya lanurtem aser meimchir anema lir, ta parnokisa ashi.
2013 nungi 2015 tsüngda District Executive Force, Nagaland Armed Police battalion 8, Police Training School aser Nagaland Armed Police Training Centre nung interview magii Constables 959, ASI aser UBSI 19 aser LDAs 7 tashi shimokogo. Anungji, item mapa nung shimoker ajak anendakjang ta NPYC-i Angh nem takhangba agütsüogo.
Ano NPF-i aniba sorkar kübok nisung mali sernung mapa inyaker tenüng aika lir aser nisung karbo mapa ka nung dang masü saka tanga nunga shimoka aliba angazükogo, ta NPYC-isa Angh dang ashi.
Nagaland sorkar kübok department ajak nung tim mesüi mapa nung aniokba maparen bushisüngdangtsü atema retired judge ka lenisüba kübok High Power Committee (HPC) ka tentetang, ta NPYC-isa takhangba agütsü.
Item denji külemi NPYC-isa Grade III aser IV mapa nung shimokba ketdangsütsü atema Service Selection Board ka tentettsü takhangba agütsü.
Tanü NPYC tir Hitilo Tep aser tongti tezülur (admn) Akum Pongen nati Secretary Raj Bhavan ajanga Angh nem tezülubaji agütsü.