Assam nung BJP, West Bengal nung TMC, Tamil Nadu nung AIADMK , Kerala nung LDF-i yimsü asütsü

New Delhi, May 19 : BJP telok asoshi takok tuluka asütsüsa tan election nung Congress telok atsüngdoker BJP teloki aniba teloki menden 86 nung takok nguogo. Item rongnung BJP teloki menden 60, AGP teloki menden 14 aser BPF teloki menden 12 angu.
Tan election nung Assam nung BJP teloki takok anguba ajanga North East states nung BJP telok yimten nung tera yanga amenok tenzüker asütsü.
Tanüngba menden nungi Assam nung yimsü tesüdak Congress teloki menden 26, AIUDF teloki menden 13 aser Independent kati takok angu.
BJP teloki Chief Minister asütsü shimtetba candidate Sarbananda Sonowal-i Majuli Assembly constituency nungi vote 18,000 dak tali agi takok angu.
Chief Minister Tarun Gogoi-ia Titabar constituency nungi vote 15,000 dak tali agi takok angu.
Election nung par teloki takok anguba osang angashili Sarbananda Sonowal-i BJP teloki aniba sorkar nung adener ajak telongjem nung state terenlok asoshi inyaktsü ta metetdaktsü.
Paisa Assam nunger aser talisa Majuli nung alirtemi parnok dak tamang kateta shimba asoshi pelaba metetdaktsü.
Chief Minister menden toktsüsang Tarun Gogoi-ia par teloki tamakok angubaji agizüker ta metetdaktsüogo.
Guwahati nung osangbenertem den jembidang, democratic yimten nung takok aser tamakokji yimya ka dang lir ta paisa metetdaktsü.
“BJP teloki takok tulu anguba jagi Assam nungertemi parnok dang nungi tuluka imlar ta angatettsüla,” ta Gogoisa ashi.
West Bengal nungbo tang yimsü tesüdak TMC teloki tatar senden nung menden 294 aliba nungi menden 203 nung takok nguogo.
Tanüngba menden nungi Congress aser Left telongjemi menden 73 nung takok angu aser BJP teloki menden asem nung takok angu. Item dakji alaka Independent aser tangar teloki menden 5 nung takok nguogo.
Tang teinyakdak West Bengal Chief Minister aser TMC Supremo, Mamta Banerjee-i Bhabanipur Assembly Constituency nungi takok tulu ngua liasü.
Lai vote meyirijang 25 dak tali agi Congress candidate Deepa Dasmunshi akok. La den ano Speaker teinyakdak Biman Banerjee-ia Baruipur Paschim Constituency nungi takok angu.
Tamil Nadu nunga AIADMK Chief J. Jayalalitha-i lar state nung otsüsütsüsa küm 32 tsüngda nung chief minister shingaia tanaben ashia-ashia madokdangba lai tang tanaben lai aniba AIADMK telokisa sorkar akümtsüsa takok tulu nguogo.
Lai aniba teloki Tamil Nadu tatar senden nung menden 232 nungi menden 125 nung takok angu. Tangar teloktem rongnungi opposition DMK teloki menden 87, Congress teloki menden 9 aser IUML teloki menden ka nung takok angu.
Chennai nung Chief Minister Jayalalithaa-i Dr. RK Nagar constituency nungi takok angu.
Sorkar akümtsüsa par teloki takok mengutetaka, DMK nung kibur M. Karunanidhi-i Tiruvarur constituency nungi 13 buba takok nguogo. Pai AIADMK telok nung toktepsang R.Panneerselvam tsükdaktsü.
Election nung takok tulu anguba sülen, Jayalalithaa-i nübortem nem takok tulu agütsüba asoshi tenüngsang agütsü aser ano tashi itshir nübortem tenzüktsü nangzük.
Tang election agiba maparen yagi kibong kati dang yimsüsüa aruba DMK telok teti asoshi tatembang kati aruogo ta laisa metetdaktsü.
Kerala nung UDF teloki yimsüsüa aliba LDF teloki atsüngdokogo. LDF teloki par state nung tatar menden 140 nungi menden 85 ngutetogo.
Tang yimsü tesüdak UDF teloki menden 46 dang ngutet.
Ano, BJP telok asoshia osang tajung kaji parnok aliba metettsüsa tatar menden ka nung takok angu aser tanüngba teloktemi menen ti nung takok angu.
Puducheery nungang Congress aser DMK tera numadangtettsusa tatar menden 30 nungi Congress-i aniba teloki menden 17 angu aser AIADMK teloki menden 4 aser tangartemi menden 9 angu.