CIHSR-i Dimapur nung angati Hepatitis camp ayongzüka agi

Bodbarnü Naga Shopping Arcade, Dimapur nung Hepatitis B aser C sentong nung CMO Dimapur, Dr. MA Wati-i CIHSR nungi doctor tem, nurse tem aser technician nunger den külemi agiba noksa angur. (Diomapur, July 29)

Dimapur, July 29 (TYO) : Christian Institute of Health Sciences and Research (CIHSR), Dimapur-i Bodbarnü Naga Shopping Arcade Complex, Dimapur nung Hepatitis B aser C atema angati Health Awareness & Screening Camp ka ayongzüka agiogo.
Tanep 7:00 ako nungi nikongtsütsü 3:00 ako tashi health camp alidang nisung 250 shi health education angazük aser nisung 161 dak azü tuzüka Hepatitis B aser C tendangogo.
Iba sentong nung tetushi süa jaokerji Chief medical officer (CMO) Dimapur, Dr. MA Wati liasü aser pai o jembidang ashiba agi, hepatitis tashidak meteta alitsü nüngdak, kechiyong ibaji ajanga nisung kati hepatitis nungi jenbua alitsü asoshi mapa inyakteter.
Taküm World Hepatitis Day omenji ‘Prevent Hepatitis, Act now’ lir aser Dr. Wati-i omen indang jembidang ashiba agi, anogoshia alima nung Hepatitis agi nisung 4,000 shi taküm samar.
Asenoki mass awareness aser mapang shitak nung teinyaktsütem inyakra, Hepatitis agi taküm laluba ajema kümdaktsütsü akok, ta paisa ashi.
Community Health Department, CIHSR Head, Dr. Atsung Aier-i ashiba agi, Bodbarnü ya bazaar anogo lir aser iba mapang nisung timba dangi osang proktsü nükjidong nung Hepatitis angati screening camp alitsü ayongzük.
Tanü sentong nung CIHSR nungi Dr. Rohan Ramesh, Dr. Rohit, Ms. Azole aser nurse tem den laboratory technician nungertemi yaritep.
Kasa sentong ya July 30 nü agitsü CIHSR nung staff aser shirangertem atema agitsü ta CIHSR ketdansgertemisa ashi.