Taliban lenir Mullah Omar süogo

Islamabad, July 29 (Agencies): Anogo ishika tejaklen Afghan Taliban-i sangdong ka ajanga, par tongti lenir Mullah Omar-i yimjung ken o pusemer ta sangdongba sülen anogo ishika tsüngda telungpur tongti lenir süogo, ta osang ka temai adokogo.
BBC osang ka ajanga ashiba agi, Afghan sorkar aser intelligence agency ajanga Mullah Omar asübaji jangjaogo.
Tang Afghanistan ketdangsertemi Mullah Omar asüba osangji bushisüngdangdagi, ta Afghan Tir Ashraf Ghani asoshi otongdar kati tanü metetdaktsü.
“Taliban lenir Mullah Omar asüba osangji onoki meteta lir. Onoki osang ano tali tejangjaba metetba sülen onoki tekaraba nung osangbenertem aser Afghanistan nüburtem nem metetdaktsütsü,” ta Sayed Zafar Hashemi-i jembibaji BBC ajanga sangdong.
Ajisüaka iba dak sentakba nung tang tashi nungbo Taliban-i kecha jembia mali.
July 15 nü Afghan Taliban-i Mullah Mohammad Omar-i jembiba sangdong ka agüja, Afghan sorkar aser Taliban na yimjung ken o jembitsü Mullah-i mulunga lir ta ashiba den külemi bendanger sepaitemi Afghan linük metoktsü tashi alima nung Muslim lenirtem lungjemer raratsü pai ayongzük.