Sri Lanka: Tzümetsüng lendong nung nisung 60 dak tema asü

Colombo, May 20 (Agencies): Taoba hopta tatemlen nungi tenzüka Sri Lanka nung tzünglu kanga sashia arua, anentsü aser tzümetsüng lendong atalokdakba ajanga tanü, Hokolbar nü tashi nung nisug 60 dak tema asüba osang bushitetogo.

Tan lendong atalokdaktsü tenzükba sülen Sri Lanka mitkar aser rescue ketdangsertemi rong aser helicopter tayimtsü amshia, lendong ajurua aliba nisung jenti kümzüka anitettsü tenzüka lir.

Ano, tzü kanga sashia metsüngtsü tenzükba ajanga Sri Lanka yimtiba, Colombo kübok lendenlen alir nisung 200,000 shi pei talidak toktsür sorkari tenemlen tentetba jenokdak balala nung jenoka alitsüsa akümba osang ka Sri Lanka’er Disaster Management Centre (DMC)-ia metetdaktsüogo.

Tan lendong tesashitibaji Colombo northeast tsütsülen, Kelani ayongkümlen densemba tesemtem nung atalokba osang bushiteta lir ta DMC-i ashi.

Kolonnawa district nüburtemia plastic pongdang tulu amshia yangluba rong nung mener tenemlen bushia oa pei taküm kümzükba osanga jangjaogo.

Tanep, Hokolbar anepdang tashi tzünglu tanen makai aruba ajanga tzü tali metsüngtsü tenzükba osang rescue ketdangsertemia metetdaktsüogo.

“Colombo nungi northeast tsütsüleni kilometer 100 shi pilar, Kegalle district nunga anentsü agi yimtsüng ana tashi anenbangba sülen tanü tashi nung nisung 34 tashi anensetba osang jangjaogo,” ta mitkartemia metetdaktsü.

Ano, tan anentsü atalokdak tila tanur 37 densema, ajak agi nisung 144 tashi samar bushiba osang ka police-ia metetdaktsüogo.