May 24 nü BJP lenir Sonowal Assam CM tenangzükba agitsü

Guwahati, May 20 (Agencies): Taruba Mongolbarnü BJP lenir, Sarbananda Sonowal-i Assam Chief Minister office atema tenangzükba agitsü, aser iba sentong nung Ato kilonser, Narendra Modi aser BJP National Tir, Amit Shah naprong adentsü.
Pa den par council of minister tem tenangzükba agitsü, ta Bharatiya Janata Party-i ashi.
Iba sentong nung adentsü atema BJP-i yimsüsüba state ajak nungi chief minister tem, Union minister tem aser northeast state tem nungi chief minister tem ajak party-i jaokogo.
Tang tasen shimba MLA tem senden ka amenba sülen BJP lenir aser Assam nung party atema sentong asameyanger tongti, Himanta Biswa Sarma-i, iba sentong nung Ato kilonser, Modi-ia jembitsü ta metetdaktsü.
“Deobarnü onoki (BJP MLA tem) BJP Legislature Party lenir atema Sonowal shimtsü, aser Hombarnü ozü teloktep Asom Gana Parishad (AGP) aser Bodoland People’s Front (BPF) MLA tem den onoki senden ka amentsü, aser Mongolbarnü Sonowal tenangzükba agitsü,” ta paisa metetdaktsü.
Arishi küm 53, Sonowal ya tang Sports Union Minister teinyakdak lir. 1980s nung Bangladesh nunger state telungi ozüng alema aita aliba anema longkak aitba mapang AASU nungi Sonowal ya kaketshir lenir ka ama yimtenren nung ajemoka liasü, aser küm pongu tejaklen pa BJP nung adenba sülen tan election nung Chief minister candidate shima liasü.
Brihostibarnü BJP aser par teloktep party temi tesüiba küm 15 yimsüsüba Congress sorkar atsüngdokogo. Assembly menden 120 nungi BJP-i menden 60 angu, par teloktep AGP-i menden 14 aser BPF-i menden 12 ngua liasü.
Taoba assembly election nung Congress-i menden 78 tashi nung ngua liasü saka tan election nungbo parnoki menden 26 dang angu.