Yakub Menon tanep 7:00 ako nung alensettsü

New Delhi, July 29 (Agencies): 1993 küm bomb aika amshia Mumbai amakba ken o nung aibelener Yakub Menon-i taochi meshiba shidi anaben tashi Tir Pranab Mukherjee-i magizük, anungji pa Brihostibar anepdang 7:00 ako nung pa tang puoka aliba Nagpur Central Jail nung lisü agi alensettsü.
Menon tasüba agi merenshitsü asoshi mapang atsülangtsü atema Bodhbar nü Supreme Court-i memulungba den külemi Maharashtra Angh-ia pai taochi meshiba shidiji magizük.
TADA court tetuyuba nung ajemdaker Memon July 30 nü alenseta südaktsütsü, aser iba anogo ya pa arishi küm 53 ajungba anogo lir.
Jail ketdangsertem osang ajanga ashiba agi, iba maparen asoshi nüngdakba ajak renema lir aser security atema Additional director general of police (prisons) Meera Borwankar Pune nungi arua Jail semdangogo. Jail temeket nung Quick Response Team (QRT) police yuja lir aser police kümkümshia lir.
Jail temeket nung CrPC, Section 144 benokogo, koba ajanga nisung pongu dak tali adenshitsü memelar.
Tanü Memon adianu Suleman aser kinünger Usman nati jail semdangba sülen osangbenertemi asüngdangba langzüdang, “Onoki Allah dak tamang akar,” ta dang ashi.
Jail inyakyim nung ajemdaker, anepdang yakta Memon mesotsü aser tzü chikotsü melaba sülen chiyungtsü tera agütsütsü. Pa nem tamangba yimsü kakettem azüngtsü mesüra sarasademtsü asoshi agütsütsü.